Footer

INDAYON NI LAGIP: Dagiti Piglat iti Biagko (Tuloyna)

Adda ngata panagayat ni Lt. Cruzaldo kaniak? masansan a saludsodek iti bagik. Diak ammo ngem adda naisangsangayan a sumngay a rikna kaniak no kasdiay nga umassibay iti panunotko ni Lt. Cruzaldo kadagiti rabii a malukagak iti turogko. Agayatak kadi metten kenkuana?

Anian a ragsakko idi agturposak, Manong Danny. Uray la nakaluaak idi awatek ti diplomak.

Sinabatnak ni Lt. Manny ket linamanonak. Adda inyawatna kaniak a regalona.

Diak napuotan nga inarakup ni Lt. Cruzaldo. Diak nalapdan ti panagtedted ti luak.

Agkatkatawa ni Lt. Cruzaldo a nangpunas iti luak. “Dika madanagan, tulonganka a makastrek iti trabaho,” kinunana.

Maysa nga aldaw, nakaawatak iti tawag ni Lt. Cruzaldo. Mapanak kano idiay kampo. Inrekomendanak nga agbalin a radioman ti CAFGU.

“Diak ammo no kasano a masubalitak ti kinaimbagmo, sir,” nakunak.

“Dawatek laeng nga agserbika a napudno,” inyisemna.

Manipud idi addan trabahok, limmag-an ti kasasaadko iti biag, Manong Danny. Umdas metten ti sueldok a para kaniak.

Sumarungkar no kua ni Lt. Cruzaldo iti kaserak. Awisennak a mangan iti ruar. Dina itulok nga aggastoak.

No la koman kaayan-ayatko, nakunkunak iti bagik, Manong Danny. Diak magawidan no kua ti agarapaap nga isu koman ti lalaki a makaigalut iti ayatko.

Maysa nga aldaw, dua a babbai ti immay iti pagtrabahuak. Anian a kigtotko idi mailasinko ida. Da Helen ken Belinda! Dagidi kinaklaseak a nangpaspasakit kaniak idi addaak pay iti elementaria.

“Tulongannakami koma,” impakpakaasida. “Innala ti Army ti asawami ta napabasolda nga agpakpakan iti NPA.”

“Kitaek no adda maitulongko,” nakunak. “Padasek ti komontak iti base no adda idiay ti asawayo.”

Babaen ken ni Lt. Cruzaldo, naammuak a nasuspetsa dagiti asawa da Helen ken Belinda a sumupsuporta iti NPA. Ngem idi mapudasdasan nga awan ti basolda, nawayawayaanda met laeng.

Kasta unay ti panagyaman da Helen ken Belinda kaniak.

Makatawenko laeng iti trabahok, nayakarak iti destino. Iti baro a destinok, adu ti nagarem kaniak a soldado ken Cafgu ngem awan ti sinungbatak kadakuada. Diak ammo ngem diak nabirokan kadakuada ti saguday ni Lt. Cruzaldo.

Maysa nga aldaw, pinaayabannak ti detachment commander.

“Adda mission ordermo. Kumappengka iti NPA. Adda kaduam a dua. Agrubuatkayo no parbangon,” kinuna ti komandermi.

“Yes, sir!” sinaluduak ti komandermi.

Sako la maamiris a napeggad ti papanak idi makaruarak. Ngem bilin dayta a masapul a tungpalek.

(Adda tuloyna)

Comments are closed.