Footer

OPINION: No saan a matuloy ti poll automation, agungar manen dagiti bangkay a manglilibeg iti eleksion

Saantayo laeng a naupay ken nagsennaay idi agpangta ti di manen pannakaituloy ti poll automation, no di nakangngegtayo pay iti makaaliaw a tokar. Daytay man tokar a mangeg kadagiti horror movies. Ket sumiplot iti panunot ti ladawan dagiti agkakatawa nga al-alia wenno dagiti agungar a bangkay a nakamusiig. Ditayo malapdan ti di agseggar ta ti panagungarda, isangbayda ti aligagaw ta lilibegenda manen ti naurnos nga eleksion. Sumngay manen ti amak nga iti panagungar dagitoy a bangkay, mapasamak ti panagsuitik iti panagpipili inton 2010.

Ti dakdakamatenmi ket ti panagungar dagiti nalaing a mangmanipolar iti manual nga eleksion. Ti panagungar dagiti adu a ‘Hello Garci’ ken dagdag-bawas! Santo sumapit a mangaliaw dagiti al-alia a presinto wenno ghost precincts a masansan ken naynay a bumotosan dagiti di katatawan ken uray dagiti billit ken bulbulong. Rummuarto la ketdi manen dagiti masirib ken natured a mangsukat kadagiti election returns. Kayarigan dagitoy ti mahikero a mangbaliw kadagiti numero a di masiputan dagiti natudingan a tiser nga agbantay ta makaturturogda metten piman iti bannog ken puyatda. Pati tally sheet, mahokuspokus. Daydiay election returns, masuktan iti sabali a naaramid sakbay ti eleksion.

Pagangayanna, agsisimparatto manen dagiti makapasuyaab nga akusasion iti panagkusit ken pannakakusit. Tumpuarto manen dagiti protesta kontra protesta. Dagiti rally kontra rally a siempre, idauluan dagiti pasurot ti naabak a mangipukpukkaw iti pannakakusitda. Manamnama ti panagungar amin dagitoy no agtuloy a saan a maituloy ti poll automation.

Surbey? Wen, tumaud met dagiti agsisimparat a surbey a saan a mapagtalkan no sadino ti nangal-alaan ti nagsurbey kadagiti datos nga indatagna. Surbey kontra surbey. No asino ti ad-adu ti kuartana isu ti mangabak. Surbey-pitaka a kunada.

Ti laeng pilawenmi unay ti kinaadda dagiti napuskol ti rupana a makibiang iti saritaan dagiti natakneng tapno di matuloy ti poll automation. Dagitoy dagiti kayatna met ti magaburan, wen, saan laeng a puruak, iti grasia. Dagiti nabileg ken maimpluensia nga agkikil ken makibiang iti saritaan uray no awanda iti dayta a saritaan.

Kaanonto nga agsardeng ti saan a nasayaat nga aramid iti panagbubutos? Saantayo a masinuo no kaano dayta a dumteng ngem ketdi, mangnamnamatayo ti pannakaiwayat ti panagbalbaliw iti panagbubutos. No saan nga ita, wenno iti sumaruno nga eleksion, nalabit a mapasamakto iti masakbayan no agpatinggan ti bileg ken karisma dagiti nagungar a bangkay iti panawen ti eleksion.

Pagsayaatanna, addan namnama a matuloy met laengen ti poll automation kalpasan ti panagsinnurot dagiti nangabak iti bidding para iti pannakaiwayat daytoy baro a sistema ti panagbutos. Iti daytoy baro a sistema, maammuanton ti resulta ti eleksion kalpasan laeng iti maysa nga aldaw, saan a kas iti kallabes nga umabot iti nasurok a makabulan sakbay a maammuan dagiti nangabak. Iti dayta a kapaut a tiempo, adu dagiti milagro a mapasamak ket no nakaturog ni nangabak, makariingto laengen iti kabigatanna a nailuspak met gayamen. Daytoy ti kangrunaan a gapu no apay a masapul a maipasdek itan dagiti automated poll machines.

Ngem masigurado nga adda laeng nga agsipsiput dagiti nagungar a bangkay no kasano a lumsotda iti daytoy baro a teknolohia. Kasapulan ngarud ti panagridam dagiti umili tapno saan nga agballigi dagitoy iti dakes a panggepda.#

Comments are closed.