Footer

Panaglako marginalized farmers, fishermen iti tiendaan, kontraen dagiti tindera ti natnateng, ikan

VIGAN CITY – Nagpangta dagiti aglaklako iti nateng ken ikan nga agwelgada no agtuloy nga aglako dagiti marginalized a mannalon ken mangngalap iti tiendaan publiko ditoy agsipud ta maapektaran ti negosioda.

“Supiatenmi ti resolusion a mangited iti maysa nga aldaw a panaglako dagiti marginalized farmers ken fishermen ditoy tiendaan ta maabogankami a natengan ken ikanan,” kinuna ti maysa nga aglaklako nga addaan iti puesto iti tiendaan.

Kinuna met ni Virginia Racho, maysa nga opisial ti gunglo dagiti aglaklako iti nateng, a planoda ti “agwelga” no agtuloy latta a matratar ti resolusion a mangited tunggal aldaw ti Mierkoles a panaglako dagiti marginalized a mannalon ken mangngalap iti tiendaan ditoy siudad iti baet a saanda a naibibiang iti public hearing.

Nupay kasta, kinorehir ni Racho a saan a welga a kas iti panagsardengda nga aglako no di mapanda ken ni mayora “dumawat iti pabor” no saan a maitaltalek ti isusupiatda iti nasao a resolusion.

Kinunana a kapatangda pay nga umuna ti presidente ti Federasion sakbay a mangiwayatda iti aniaman a tignay.

Sagudayen ti resolusion nga indatag ni Konsehal Ever Molina a maituding ti aldaw ti Mierkoles a kas market day para kadagiti “aglabbalabba” nga aglako a mannalon ken mangngalap nga agnaed ditoy siudad.

Saan nga agbayad iti entrada dagitoy iti panaglakoda iti naituding nga aldaw iti tiendaan.

Iti immun-una nga interbiona iti media, kinuna ni Molina a rumbeng laeng a saan nga agbayad iti entrada dagiti mannalon nga agilako iti apitda iti kanatenganda iti parparaangan wenno sobra iti mabanniitan wenno makalapanda a lames iti karayan wenno baybay a para iti pamiliada idinto nga inyunay-unayna a nailanad daytoy a probiso iti Local Government Code.

Ngem nagbalin a kontrobersial ti nasao a rseolusion gapu iti mapapati a saan a pannakairamraman dagiti aglaklako iti nateng ken prutas ken ikan iti tiendaan publiko ditoy iti pannakaisayangkat ti public hearing a nakaawisan dagiti amin a sektor a maseknan iti nasao a resolusion.

Iti naudi a session ti konseho idi Hulio 6, naaprobaran ti pannakaadaptar ti committee report a saanen nga agdalan pay iti sabali a hearing.

Sakbayna, nangangay ti dua a komite, ti agrikultura ken ti market and slaughterhouse, iti public hearing mainaig iti nasao a resolusion a nakaawisan dagiti nadumaduma a sektor.

Ngem dua a kameng ti komite a nagpirma iti committee report a pakaibilangan da Konsehal Henry Formoso ken Konsehal Loreto Quibilan ti nagbaliw ti panunotda ket imbabawida ti pirmada agsipud ta kasapulan pay ti sabali a public hearing tapno maala ti pagtaktakderan dagiti market vendors nangruna dagiti aglaklako iti nateng ken ikan.

Uray ni Konsehal George Villanueva, nagpirma iti committe report ngem inla-nadna nga adda reserbasionna.

Tabla ti resulta ti panagbubutos ngem pimmabor ni Vice Mayor Franz Ranches a saanen a maiwayat pay ti sabali a hearing iti baet ti panangannugotna nga adda procedural flaw ti report.

Kinuna ti maysa nga aglaklako iti nateng a maaboganda agsipud ta awanton ti umuli pay iti maikadua a kadsaaran no maipalubos ti panaglako dagiti marginalized farmers ken fishermen iti baba.

Ngem kinuna ni Molina a masapul nga adda maaramid a guidelines tapno madetermina no pudno a marginalized ti mannalon wenno mangngalap kasta met a malimitaran ti volume dagiti lakoda.#

Comments are closed.