Footer

SARITA: REBOLUSION (Tuloyna)

Timmakder met ti naawagan iti Manong. Dakdakkel ken nabakbaked daytoy ngem ni Sigab. Naimatangan ni Sip-i ti panagdudusol ti pakabuklanna.

“Agpayso ti nasao ni Ading,” kinunana. “Ammoyo met siguro ti akemko a no ania ti mayallawat kaniak, idiretsok ida iti kuribot ken lata nga inton madanon ti orasna, alaen dagiti basurero tapno maibellengda.”

“Ti rigatna,” inyallawat ni Sigab, “nakakaanton dagiti kalugarantayo kadagiti rediek, Napateg a Sip-i! Ti makadakes, adda sabidong dagitoy a tagilakoda ta pagbaliktadenna pay ti rusok dagiti makakaan. Pagangayanna, maakas ti pigsada!”

Sabidong? nagallangugong iti panunot ni Sip-i. Saan ngata a dayta ti ramut ti bileg a dumardarup kadakuada ken ni Pitui Tari?

“Gapu met kadagitoy a basura, saan a naannayas ti panagbombak kadagiti bangkag ta mayanginda a mangappel kadagiti kanal. Madlawyo met ngata ti epektona no bassit ti maitedko kadakayo a danum,” kinuna ni Osup. Di makatalna; kasla pay ketdi agtigtigerger.

“Wen!” ti makatitileng a sungbat ti tallaong.

“Marikriknak met dayta,” intuloy ni Osup. “Agkakapsutak nga agbomba ta makaulaw ti angot iti aglawlawko. Agal-alak pay ken kasla kamkamatek dagiti kanito.”

Immarimbangaw ti aglawlaw.

“Maymaysa ti gapuna daytoy,” imbikag ni Melad. “Adu unayen dagiti ganggannaet iti aglawlaw a mayat a mangsakup kadatayo. Ti rigatna, dayta nakaitalkan daytoy ayantayo a disso, nga addaan iti kontrol kadatayo ami – pati kenka, Napateg a Sip-i – ket dina man la kitaen dagiti pastrekenna. Asinotay’ koma, aya, nga agkedked iti bilinna?”

“Agpayso ‘ta kunam, Melad,” inkanunong ni Langto. “Tagabotayo laeng a sidadaan nga agtungpal nupay makuna met nga adda pannakalidertayo,” kinitana ni Sip-i. “Dagitoy a ganggannaet ti makagapu ti panagkurkurangko iti taraon a para iti pangpatibkerko iti pundasion ti pamilia a binangonko. Ngem agawen met dagita a ganggannaet ti para kaniak!”

In-inut ti itatakder ni Rada, ti babai nga aginakbay ti banglona: adda pangngadua iti isipna no agsao wenno saan. Ngem napipia no mayebkasna ti adda a riknana.

“Napateg a Sip-i,” kinunana iti natinggaw a timek, “dakkel ti amakko iti marikriknak. In-inuten a masisip dagita a ganggannaet ti banglok. Kataydanto laengen ti mabati kaniak: agamakak ta makasabidong dagitoy; di makapaltuad iti biag!”

Nakagat ni Sip-i ti bibigna. Nariknana ti kinnit ti agtindeken nga init kadagiti kudilna.

“Apay, naibus kadin ti igamyo a pangsarangetyo kadagitoy a sumsumrek?” inamadna.

“Napateg a Sip-i,” timek ni Otab, “kas nakunak itay, naidumduma ti kinarungsot dagitoy a kabusor. Namsekda iti panglakagan tapno maparmekdakami. Saanen nga umdas ti birtud dagiti igammi.”

“No agtultuloy daytoy a parikut, Napateg a Sip-i,” binagi met ni Taraki, “di masasaan a maungawto ti lugartayo. Ita pay laeng, mariknakon nga aglusdoy dagitoy tumeng no kasta a sumang-atak kadagiti bantay. Adu dagiti lamok ken alimatek nga agsusop iti pigsak kadagiti waig ken bakir.”

Immariwawa ti kasingin ni Otab. Tumanabutob a nagpasango. “Basolmo daytoy, Sip-i!” imbugtak daytoy kenkuana. “No koma naturedka a lider, sika ti mangsaranget kadagitoy nga agbasakbasak. Wenno saan, sika koma ti makisarita iti nakaitalkan daytoy a disso tapno dina pastreken dagita nga estranghero yantangay makitkitana met a nagtaud dagitoy kadagiti ruot a walang!”

Kasla nadanog ti pispis ni Sip-i iti dayta nga imbalikas ti kasingin ni Otab.

(Maituloyto)