Footer

TARAON TI PANUNOT: SILAW TI LUBONG

Ref. Mat. 5:14-16

Nabaknang dagiti agassawa a Mendez. Adu ti negosioda, mararaemda iti gimong. Pasig a propesional a nangato a saadda iti gobierno ken pribado a kompania dagiti innem (uppat a lalaki ken dua a babai) nga annakda.

Doktora ti maikapito ken buridek. Isu ti kunkuna dagiti agassawa nga Alejandro ken Consuelo a krusda. Ta idi nagraduaren ken nakapasa iti board exam ni Angela, saan nga iti ospital ti nangituonanna ti imatangna no di kadagiti walang nga ubbing iti kalkalsada, dagiti bagtit nga agwarawara.

Kayat dagiti agassawa a Mendez a mapan agadal ken agespesialista ni Angela idiay America ngem sabali ti taray ti utek ti anakda. Nangipatakder iti foundation a nangiserbianna ti adalna kadagiti bagtit ken ubbing iti kalkalsada.

Kontra dagiti agassawa a Mendez kasta met dagiti kakabsatna iti sinerrek toy doktora.

“Sayang ti nagastosmi iti panagiskuelam!” kinuna ti amana.

“Anakko, awan ti maalam iti dayta nga ar-aramidem,” insarurong ni Mrs. Mendez.

“No saanak nga aggunay, papa, mama, asino ti mangaasi kadagitoy nakakaay-ay-ay a parsua nga agwalangwalang ditoy siudad?” insungbat ni Angela.

“Adda dagiti akinrebbeng a mangkita kadakuada, saan a sika ti aggunay!” intebbag ti ama.

“Pagrebbengantay amin, papa. No ti bukodtayo a bagi laeng ti kitaentayo, ad-adda nga umadu dagiti kakaasi, ta datayo nga addaan ket ditayo ammo ti mangaasi,” kinuna toy anak.

Gapu iti saan a mabakog a pangngeddeng toy anak, ad-adda a limmawa ti giwang iti nagbabaetanda.

Limmabas ti pito a tawen. Dinaydayaw ti kaaduan saan laeng a ditoy pagilian no di pay iti ballasiw-taaw ti aramid ni Angela. Naipaayan iti pammadayaw ni Angela ket naawis dagiti dadakkelna iti programa.

No di naggapu iti UNICEF ti awis, saan koma a dimmar-ay dagiti agassawa a Mendez.

“Naggasat ketdin da Mr. ken Mrs. Mendez ta naaddaanda iti anak a saan a nangiyimot ti panawen, sirib ken aminna kadagiti agkasapulan. Saan a kinaluban toy anak ti bukodna a silaw no di ket implastarna tapno mairanud dagiti nakakaasi a kailianna. Manmano ti anak a kastoy kadagitoy a panawen. May their tribe increase!” imbitla ti opisial ti UNICEF.

Simmalput iti puso da Mr. & Mrs. Mendez dagitoy a balikas.

“Saan a siak ti rumbeng a pakaiyawatan daytoy a pammadayaw no di ket dagiti nagannak kaniak a nakautangak iti biag. No awanda, awanak met itoy a biag. Awan koma met daytoy a pammadayaw. Diak koma met natulongan dagiti nakakaasi a kakabsat iti kalkalsada. Kiddawek ngarud nga umuli da Papa ken Mama ditoy entablado ta isuda ti kaduak a mangawat iti pammadayaw!” kiniddaw toy anak.

Napalua dagiti agassawa a Mendez. Lalo idi yarakup dagiti gagayyemda ti panagdayaw ken panangkablaaw.

Dakayo ti pannakasilaw ti lubong. Saan a mailinged ti ili a nabangon iti rabaw ti maysa a bantay. Awan ti manggangat iti pagsilawan sana kaluban iti salop. Iparabawna ketdi iti nairanta a pagsaadanna tapno aglawag kadagiti amin a tattao nga adda iti balay. Masapul a kasta koma met ti panaglawag ti silawyo iti imatang dagiti tattao, tapno makitada dagiti naimbag nga aramidyo ket idaydayawda ti Amayo sadi langit.”

Ti kinabaknang, kinasirib ken ti panawen nga ipaaymo iti padam a tao ti silaw a madakdakamat ditoy, kailian, No ipaidammo dagitoy, kasla kinalubam idan. Arig impaidammo ti lawagmo a mangsilaw met iti dalan dagiti kailiam.

Ala, ngarud, kailian, babayu!