Footer

2,500 pamilia, mawarasan iti ukay-ukay nga aruaten

VIGAN CITY – Sangabagon nga ukay-ukay nga aruaten ti nakasaganan a maiwaras kadagiti marigrigat a pamilia nga agindeg iti upland municipalities, daytoy ti impakaammo ni Vice Gov. Jerry Singson itay nabiit.

All set, ti la ur-urayekon ti aldaw a yiskediul dagiti mamayor,” kinuna ni Singson.

Segun ken ni
Singson, naibodega dagiti ukay-ukay iti maysa a pagsinean iti Lyric Cinema ditoy siudad ket nakasaganan dagitoy a maiwaras kadagiti pamilia iti sangapulo ket uppat nga upland municipalities ditoy probinsia a biktima ti bagyo.

Kinuna ti bise gobernador a pito a truck ti pattapattana a pakaipalaonan dagiti ukay-ukay a naaprobaran a maited iti Ilocos Sur idi napan a tawen ngem iti di ammo a gapu, naited iti Mindanao. Innayonna a maysa laengen a truckload ti naited nga ukay-ukay nga aruaten iti Ilocos Sur.

Kinuna ni Singson nga idi intawag ni DSWD Secretary Esperanza Cabral nga adda maited nga ukay-ukay iti Ilocos Sur, dinagdagusna a pinabunag ta dinto manen sabali ti makaala sana indulin iti maysa a pagsinean a kukuana.

Segun iti bise gobernador, naurnosdan kadagiti mamayor dagiti 14 nga upland municipalities ti listaan dagiti resipiente ket agdagup iti 2,500 a pamilia ti pakaiwarasan dagiti ukay-ukay a pakairamanan ti Alilem (80), Lidlidda (200), San Emilio (180), Banayoyo (180), Nagbukel (150), Cervantes (250), Salcedo (230), Sigay (230), Galimuyod (180), Sugpon (250), Quirino (180), Del Pilar (60), Suyo (250), ken Burgos (80).

Kinuna ni Singson a yur-urayna laengen ti iskediul nga ited dagiti mamayor para iti aldaw a pannakaiwaras dagiti ukay-ukay.

Innayon ti bise gobernador a mabalin nga addanto pay nayon nga ukay-ukay a maited iti probinsia.#

Comments are closed.