Footer

BANNER NEWS: 5 kameng ti grupo a kidnap-for-ransom, nagudas iti rinnupak

DAGUPAN CITY – Lima a mapapati a kameng ti grupo a kidnap-for-ransom ken panagtakaw/hold-ap ti nagudas iti pannakipinnaltogda kadagiti nagtipon nga operatiba a polis ken militar sakbay ti parbangon ti Hulio 29 iti Lucao Dawel Diversion road ditoy siudad.

Nagudas iti pinnaltog da Elisco Emuslan, 34, residente iti San Andres Bukid, Manila; Jesus Matienzo Jr., 40, taga- Masbate, Masbate; Joey Tindugan, 34, taga-Mlang, North Cotabato; Glenn Ares, 32, taga-Caalibangbangan, Cabanatuan City; ken Edgardo Estrella, 39, residente iti Bagong Barrio, Caloocan City.

Iti maysa a report manipud iti Pangasinan Provincial Officer, naammuan a nakaawat ti Dagupan City police station iti inpormasion nga adda kidnapen ti maysa a kidnap-for-ransom gang a tao iti Dagupan City wenno iti kabangibangna a lugar.

Segun iti report, nakita ti mobile patrol unit dagiti suspetsa a naglugan iti puraw a KIA KC2700 van nga awanan iti plate number iti Bonuan-Binloc ditoy siudad.

Mapapati a natakaw ti nasao a lugan iti napalabas nga aldaw.

Kinuna ni Senior Supt. Percival Barba, police director ti Pangasinan, nga idi asitgan ti patrol dagiti suspetsa, nagpatarayda nga immadayo ket kinamat dagiti polis. Idi maipiskot dagiti suspetsa, pinaputokanda dagiti polis ket nagpaputok met dagitoy a nagtungpal iti pannakadunor dagiti lima a suspetsa.

Naitaray dagiti nasugatan a suspetsa iti Region I Medical Hospital ngem naideklara dagitoy nga awanen ti biagda idi maidanonda iti ospital.

Nabigbig dagiti suspetsa babaen dagiti ikutda nga AFP ID cards.

Segun ken ni Senior Supt. Robert Po, hepe ti Criminal Investigation and Detection Group (CIDG), National Capital Region, uppat kadagiti suspetsa, da Emsulan, Matienzo, Tindugan ken Ares, ket dati a miembro ti Armed Forces of the Philippines.

Kinuna ni Po a maysa a corporal ni Emuslan a na-discharged idi Pebrero 2004, dati nga army staff sargeant ni Matienzo a naikkat idi September 2003, dati nga army corporal ni Tindugan a na-discharged idi Marso 2007; ken private first class a nag-awol ni Ares idi 2008.#