Footer

EDITORIAL: Mapukpukawen ti kabakiran ti Cordillera

Makaalarma daytoy data manipud iti Department of Environment and Natural Resources: nasurok a 300 ektaria a kabakiran ti mapukpukaw iti tinawen iti Cordillera.

Iti naibasar a data ti DENR manipud iti 2005 agingga iti 2008, adda average a 317.78 nga ektaria ti kabakiran iti rehion ti Cordillera ti mapukpukaw iti tinatawen babaen ti illegal a panagtarikayo, uram ken konbersion dagiti daga para iti agrikultura ken para industria.

Kas napaliiwtayo, mangrugin nga agibales ti nakaparsuaan gapu iti panagabuso dagiti tattao.

Iti sumagmamano a probinsia iti Cordillera, mapaspasamaken dagiti landslide a nakaigapuan ti pannakapukaw dagiti biag ken pannakadadael dagiti sanikua.

Kasta met a mangrugin nga agpukaw dagiti sabong, mulmula ken dadduma pay a nabiag gapu iti in-inut a pannakakalbo dagiti kabambantayan a pagtataenganda iti mano a siglo ken iti ipupudot ti panawen a saan a kabaelan ti bagida nga arakupen.

Marikna metten dagiti agindeg iti rehion ti mangrugin nga ikikiddit dagiti danum ken ubbog a mangpasayak kadagiti taltalonda ken pagtaudan iti inumenda gapu iti di agsarday nga illegal a pannakapukan dagiti kayo babaen dagiti buklis a concessioner a napigsa ti kapetda kadagiti opisial ti gobierno ken dagiti kaingero tapno laeng adda bangkagenda.

Sabali pay a gapu ti panagbalbaliw ti klima ti pannakapalanas dagiti kabakiran tapno agbalinda nga aspaltado wenno kongkreto a kalsada a pagdalanan dagiti kotse, dyipni ken dadduma pay a lugan iti timmakder a subdibision wenno pabalay, pribado man wenno publiko ken iti pannakaipasdek dagiti paktoria ken industrial zones.

Ala, sangkadagadag ti DENR, ti ahensia a nakaipablayan ti pagrebbengan a mangsaluad iti bumasbassit a kabakirantayo, ti panagtitinnulong dagiti umili para iti pannakasulnit dagiti napugipog a kaykayo iti kabakirantayo babaen ti reporestasion.

Uray ti National Irrigation Administration ken ti Department of Agrarian Reform, tumultulongda payen iti reporestasion dagiti kabakirantayo.

Ngem iti bukodmi a biang, saan nga umdas iti panagiwayat kadagiti programa ti reporestasion wenno panagmula kadagiti kalbon a kabakirantayo.

Kasapulan ti natangtangken a panangipakat dagiti paglintegan nangruna iti maikontra iti illegal a panagpukan iti kayo. Agingga iti saan a mapasardeng ti panagpukan iti kayo uray kadagiti preserbado a lugar iti kabambantayan, agtultuloy latta ti ibabassit ti forest cover ti pagilian.

Uray ginasut a reporestasion ti maisayangkat, saannanto a masulnitan dagiti kalbo a kabakirantayo. Laglagipentayo koma a pinullo a tawen ti palabsen tapno makarangpaya ti kayo ngem babaen iti chain saw, maungaw iti apagkanito.

Kangrunaan koma nga ipakat ti gobiernotayo: total ban iti panagpukan iti kayo tapno makadakkel pay dagiti naimula babaen ti programa a reporestasion.#

Comments are closed.