Footer

Gobierno munisipal, planona umutang para serbisio ti danum dagiti barangay

CABUGAO, ILOCOS SUR- Panggep manen ti gobierno munisipal ti umutang iti bangko tapno maikalawa ti serbisio ti danum ditoy nga ili.

Maysa a surat a naggapu ken ni Mayor Dioceasar Suero ti naidatag iti sangguniang bayan ditoy a mangpaaprobar iti maysa a resolusion a mangted iti otoridad iti mayor nga umutang iti maysa a bangko tapno maidanon ti serbisio ti danum iti sumagmamano a barangay daytoy nga ili.

Babaen ti nasao nga loan, manamnama a maidanon ti serbisio ti Cabugao Waters kadagiti sumagmamano a barangay iti daya a pakairamanan ti Maradudon, Catucdaan, Alinaay ken Caellayan.

Segun iti mayor, adda kiddaw dagiti opisial ken residente dagiti nadakamat a barangay tapno maidanon kadakuada ti serbisio ti danum.

Ngem sumagmamano a konsehal iti nangibatad iti reserbasionda iti yuutang manen ti gobierno munisipal iti baet a mangrugin nga agbayad daytoy iti inutangna a P35 milion para iti expansion program ti Cabugao Waters.

Segun iti maysa nga opisial, 20% iti internal revenue allotment ti mailatang para iti pagbayad iti utang ti gobierno munisipal.

Mapapati a sidadaan ti Land Bank of the Philippines a mangpautang iti gobierno munisipal iti P15 million para iti nasao a proyekto. Ngem mapattapatta nga umabot iti P19 milion ti magastos iti nasao a plano.

Itay napan a tawen, kiniddaw dagiti opisial ti Cabugao Waters a maingato ti singir ti makunsumo a danum tapno adda pagbayadna iti utangna para iti nasao nga expansion programna.

Ngem nababalaw ketdi dagiti opisial ti waterworks gapu iti alegasion a saan nga episiente a panagkolekta iti singir ti makonsumo a danum dagiti consumers iti binulan.

Agdagup iti P6 milion ti tinawen ti bayadan ti Cabugao Waters iti utangna nga agpaut iti 15 a tawen.

Segun iti maysa nga opisial, P2 milion laeng ti napastrek ti Cabugao Waters ket ti gobierno munisipal ti mangibaklay iti P4 milion a kurang ti pagbayad.#