Footer

Gobierno probinsial, gumatang iti 10 ambulansia iti PCSO

VIGAN CITY – Dua a resolusion ti inaprobaran ti sangguniang panlalawigan itay nabiit a mangited iti otorisasion iti gobernador ti probinsia a sumrek iti katulagan iti Philippine Charity Sweepstakes Office para iti pannakagatang kadagiti ambulansia ken iti pannakaaramid ti deed of donation iti lote a pakaipatakderan ti pasdek ti Civil Service Commission ken ti National Tobacco Administration.

Inaprobaran ti provincial board iti sessionda itay Hulio 28 ti resolusion a mangipalubos ken ni Savellano a sumrek iti memorandum of agreement iti PCSO para iti pannakagatang iti sangapulo nga ambulansia para iti probinsia.

Adda programa ti PCSO a mangipaay iti ambulansia kadagiti local government units iti nalaklaka a presio.

Sabali pay a resolusion ti inaprobaran ti sangguniang panlalawigan a mangited iti otorisasion ken ni Savellano para iti pannakaaramid iti deed of donation iti lote a pakaipatakderan ti pasdek ti Civil Service Commission ken ti National Tobacco Administration.

Kanaig daytoy, kinuna ni Civil Service Commission provincial officer Hedy Lardizabal a nangaramid ti opisinana iti letter of appreciation para iti sangguniang panlalawigan gapu iti pannakaaprobar iti resolusion a mangted iti gobernador iti otorisasion a mang-execute iti deed of donation ti lote a pakaipatakderan ti opisinada.

Kinuna ni Lardizabal nga idi pay la napan a tawen a nakasaganan ti pondo a pagpatakderda iti opisinada ket inamakna a maibabawi ti pondo no awan ti lote a pagpatakderanda iti opisinada.

Segun iti hepe ti CSC, adda payen naaramid a program of work para iti pannakaitrabaho ti maipatakder a building.#

Comments are closed.