Footer

INDAYON NI LAGIP: Dagiti Piglat iti Biagko (Maudi a paset)

Timmarayakon nga immadayo, kaduak ti dua pay nga amasona. Iti likudanmi, nagsasaruno dagiti putok a namnamaek a naggapu ken ni Ka Jayson tapno agsarimadeng dagiti soldado a dumarup.

Dikami nagsardeng a nagtaray. Madamdama, awanen ti mangegmi a kanalbuong. Manen, nagtulid ti lua iti pingpingko.

Naguni ti radiok. Nailasinko ti timek ni Lt. Cruzaldo.

Surotenyo ti karayan nga agpaabagatan. Iti sang-atan, addanto agur-uray kadakayo. Pagsilawenyo ti flashlightyo iti mamitlo kas senias nga addakayon tapno didakayo mapagbiddutan,” imbilinna.

Wen, sir,” nakunak.

Nakagtengkami iti karayan. Indauluak dagiti kaduak a nangpanurnor nga agpaabagatan. Nagalis dagiti bato ket pasaray maikagliskami.

Nagsardengkami iti sang-atan. Pinagsilaw-pinagiddepko ti flashlight.

Madamdama, adda naggangat-nagsilaw iti sang-atan. Nakaangesak iti nalukay. Dagiti soldado a mangpadpadaan kadakami.

Idi makasang-atkami, nagsaludoak iti pannakapanguloda. Sinaluduannak met. Masmasdaaw dagiti dua nga amasona a kaduak. Ngem saandan a nagkitakit idi alaen dagiti soldado dagiti armasmi. Ammok a nabayag metten a tarigagayanda ti agsubli iti ikub ti turay.

Diak malagipen ti kawatiwat ti dinaliasatmi. Dandani agbannawagen idi makadanonkami iti highway. Manipud dita, naglugankami iti dyip ket nagpaitulodkami iti uneg ti ili. Ditoy a nangaldawkami.

Timmawag ni Sarhento Joe Cruz iti headquarters. Aguraykami kano ta adda umay mangala kadakami.

Alas dos idi adda agsardeng a dyip iti nagpaknianmi. Limmugankami. Intuloddakami iti headquarters.

Naisem ni Lt. Cruzaldo a nangsabat kadakami. Pinikpikna ti abagak.

Good work,” nakunana. “Ken naragsak a kasangaymo!”

Nagmalangaak. Nalagipko a kasangayko gayam nga agpayso. Uray la nakaisem ni Lt. Cruzaldo idi makitana ti langak.

Kas regalomi iti panagballigi ti missionyo, irekomendarko a maipromotka a kas senior radio operator,” kinunana.

Iti umuna a gundaway, pinerrengko iti nabayag ni Lt. Cruzaldo.

Apay a kasta unay ti panangisakitmo kaniak?” sinaludsodko.

Pinerrengnak ni Lt. Cruzaldo. “Kasapulan kadi pay nga ibuksilak?” sinaludsodna.

Diak nakatimek, Manong Danny. Diak ninamnama dayta a balikasna.

Diak nakapagkitakit idi awiden ni Lt. Cruzaldo… ay Manny gayam…. ti imak sana pinisel.

Daytoyen ti pangipatinggaak iti salaysayko, Manong Danny.

Kastoy gayam ti biag, adu dagiti sugat a mangited iti saem iti kinatao ngem aglunit ken agbalinda a piglat a mamagbalin kadatayo a napigpigsa iti panangsurottayo iti kaikariantayo a direksion.

Toy pagayammo,

Noraly Santos

Comments are closed.