Footer

No mapili a Presidente ti asawana: salun-at, edukasion, agrikultura, inprastruktura ti tutokanna: Cong. Villar

VIGAN CITY – Ti pannakapasayaat ti salun-at, edukasion, inprastraktura ken ti panangtulong iti sektor agrikultura nga ayan ti 40% a marigrigat ti kangrunaan a tutokan ni dati a Senate Pres. Manny Villar no isu ti mapili a presidente ti pagilian.

Daytoy ti impatalged ni Las Pinas Congressman Cynthia Villar, asawa ni presidentiable Manny Villar bayat ti naangay a Pastors and Church Leaders Consultation iti University of Northern Philippines a naangay ditoy a siudad idi Hulio 24.

Imbataden ni Villar ti panagkandidatona kas presidente ti pagilian inton umay a tawen.

Saan a maikari ti asawak a maminpinsan a mabaliwanna ti bureaucracy ngem maipasiguradok a saanto a maimbolbar kadagiti anomalia ken agtrabahonto tapno maipaay dagiti kasapulan a serbisio dagiti umili aglalo kadagiti marigrigat,” kinuna ni Cong. Villar.

Kinuna ni Dip. Villar a gapu ta addaan ti asawana iti bukod a kuarta, saanna a kasapulan ti umasideg ken makikompromiso kadagiti negosiante wenno dadduma pay nga indibidual tapno makaur-or iti pondo nga usarenna iti kampania.

Mainaig iti C5 road a mapapati a nakaimbolbaran ni Sen. Villar, kinuna ti diputada nga awan ti napasamak a double insertion ken overpricing iti dagada a dimmalanan ti kalsada.

Kinunana a dua a sag-P200 million ti pategna a fly-over ti naaramid kas inlawlawag ti Department of Budget and Management, Public Works and Highways ken ni Senate Pres. Juan Ponce Enrile ken saan nga inawat ni Villar ti bayad ti lotena a nagnaan ti kalsada a base iti zonal value daytoy.

Kinuna ti diputada a ti agtultuloy a panagpayakpak ti popularidad ni Sen. Villar kadagiti surbey ti mangipakita a saan a patien dagiti umili dagiti maibatbato a kontrobersia iti asawana.

Kabayatanna, insuro ni Bishop Fred Magbanua ti Jethro Principle, wenno kasano ti pumili iti kandidato babaen ti prinsipio ti Biblia kadagiti timmabuno iti konsultasion.

Sinaggaysa dagiti partisipante nga inikkan iti grado dagiti siam a presidentiables a da Jejomar Binay, Noli de Castro, Francis Escudero, Bayani Fernando, Richard Gordon, Loren Legarda, Mar Roxas, Gilberto Teodoro, ken Manuel Villar segun iti kapabilidad, kinamanagbuteng iti Dios, kinamapagtalkan ken kinapudno.

Segun iti bishop, ti kandidato a makagun-od iti kangatuan a grado maibasar itoy a prinsipio ti rumbeng nga ibutos dagiti umili inton umay a panagpipili.#

Comments are closed.