Footer

SALAYSAY: “Apo Iro” ni Dr. Godofredo S. Reyes (Maudi iti dua a paset)

Kabaelanyo, Doktor?” kasla agduadua ti asawa a lalaki a timmangad ken ni Dr. Reyes.

Wen, no umannugotka…”

Adda aya pagoperaranyo?”

Improvised. Naadalko daytoy iti paggugubatan iti maikadua a gubat sangalubongan. Agoperarkami iti Batallion Aid Station iti sirok ti moskitero tapno awan ti ngilaw a sumrek a mangted iti kagaw. No ipanmo idiay Dagupan, amangan no dimo maidanon a sibibiag.”

Wen, Doktor, operaemon,” kinuna ti asawa a lalaki.

Ket inopera a dagus da Dr.Reyes ti agkumkumbulsion a pasiente. Ni Dr. Monico Gualberto ti timmulong iti operasion. Naiwa ti tian. Naibukra ket rimmuar dagiti bagbagis ti pasiente. Nagdanag ni Dr. Gualberto ket uray la nagkaling-etan. Ngem sinuruan ni Dr. Reyes no kasano ti agisubli iti bagbagis babaen ti “operating towel.” Kalpasanna, inukritan ni Dr. Reyes ti matris. Nagpusuak ti dara. Kinautna nga inruar ti maladaga. Dinarasna nga intag-ay, sana tinapik ti agsumbangir a patong daytoy agingga a nagibit ti maladaga. Inyawatna iti nars tapno isun ti mangasikaso iti maladaga. Intuloyda a tinaming ti pasiente agingga a nagsardeng a nagkumbulsion.

Nakalasat ti ina. Nagbiag ti anak.

Diak makabaybayad, Doktor,” kinuna ti asawa a lalaki ket pinagakkubna pay dagiti dakulapna.

Nagwaras dayta a pagteng iti Urdaneta. Ad-adu manen dagiti mapan agpaagas ken ni Dr. Reyes. Dayta ti rason a nangbangon iti klinika iti bukodda a lote. Gimmatang pay iti lote a nangbangonanna iti klinikana iti Barangay San Vicente.

Nagserbi ni Dr. Reyes iti barangay ken iti kabisera. Kumpleto dagiti alikamenna ken adda pay Army x-ray a nagatangna.

Mierkoles ken Huebes nga agoperar iti Cuyapo, Nueva Ecija, Biernes iti Villasis, Pangasinan, Sabado iti Urdaneta, Pangasinan. Kalpasanna, mapanna met tulongan ti kabsatna iti Sta. Maria, Ilocos Sur.

Immasideg manen ti panagpipili kadagiti agsaad ti kina-alkalde. Bulan ti Nobiembre 1954, di pay la nakapili ti Nacionalista Party ti ilabanda. Kinasarita dagiti panglakayen ti partido ni Dr. Reyes.

Saankanto a maparigat nga agkampania, dakamto ti nangnangruna,” kinunada kas pananguyotda kenkuana.

Ikkandak pay iti panawenko nga agpanunot. Agpatangkam pay ken ni Cion,” kinuna ni Dr. Reyes.

Nagsubli manen dagiti panglakayen ti partido a manguyot kenkuana ta awan ti napigsa a kandidato ti partido para iti ilida a Sta. Maria.

Nautob ti doktor a masaksakit met ti ilina. Nasken a maagasan. Agserbi ngarud para iti ili.

Iti daydi nga eleksion, napagasatan manen a mayor iti Sta. Maria. Simmaruno ti panagdiputadona iti maikadua a distrito. Sa idi kuan, gobernador ti probinsia ti Ilocos Sur.

Dayta ti kabibiag ni Dr. Godofredo S. Reyes. Pinanawanna ti ilina gapu iti pannakaabakna iti politika ngem politika met laeng ti nangisubli kenkuana iti nakaiyanakanna nga ili. Saan laeng a ti nakaiyanakanna nga ili ti nagserbianna no di pay ti sibubukel a probinsia ti Ilocos Sur.#

(Inadaw ti autor daytoy paset ti istoria ni Dr. Godofredo S. Reyes iti daniw a napauluan iti “Pannakaabak”a nairaman iti libro a “Layag ken Timon” a koleksion dagiti opisial ken kameng ti GUMIL Pangasinan. Agsipud iti panagnaed ni Dr. Reyes iti Villasis ken Urdaneta idi pimmanaw Sta. Maria, Ilocos Sur, imbilang ti gunglo a kas kameng. Nagpresidente iti GP ti autor idi 1999-2000 ket nairaman met dagiti sinuratna a nangabak a daniw ken sarita iti nasao a libro.)