Footer

SARITA: KAS KAGITA TI KOBRA (Tuloyna)

Kellaat, naibuang ti lunod iti barukongna.

Daytoy ti tandaanam, awan ti makatagikua kenka no saan laeng a siak! Iyanakmonto dayta sikogmo nga awanan simbeng ti panunot kas kasukat ti sakit nga impalak-ammo kaniak,” nadagsen dagiti balikas a nagaon iti bibigna.

Manipud idin, nagpukaw ni PFC Emmanuel Sto. Domingo. Ngem kagiddan ti panagpukawna ti iruruar ti narungsot a kobra a nangburak iti talinaay ti San Luis.

Kalpasan ti makabulan, naiwalang iti kaleddaan ti dandanin saan a malasin a bangkay ni Jake. Awan ti makaammo no asino ti makin-aramid iti nakaam-ames a krimen. Nasarakan ti bangkayna sumagmamano a kilometro ti kaadayona manipud iti balayda. Ti nakakaskasdaaw, awan ti nakapuot kadagiti guardia ti mansionda idi naitalaw daytoy. A! maysa nga eksperto ti makin-aramid. Kasla kobra a saan a nadlawan ti panaguyasna iti katengngaan ti naulimek ken nasipnget a rabii.

Manipud iti nagsapidenganna a puon ti kayo iti tuktok ti turod, nalawag a makita ni Boy Kobra dagiti immaribungbong a tattao bayat ti panangbagkat dagiti polis iti bangkay. Uray la nangigis ti isemna iti pannakangegna iti sangit ni Arianna. Kasla musika a nangwaswas iti dagensen ti kaungganna ti dung-aw ni Arianna.

Lak-amem ti sakit ti nakem ti maawanan iti ipatpateg, kas iti impalak-ammo kaniak!” kinunana.

Nangemkem ni Boy Kobra a nakalagip iti dayta a paset ti napalabasna. Immanges ti nauneg. Parte ti biagna a namagbaliw a namimpinsan ti direksion ti biagna. Idi simple laeng a biag ti kayatna. Agasawada ken ni Arianna ken maaddaanda iti bukod a pamilia. Napanunotna: ti tao ti mangaramid iti bukodna a dana. Pinili ti ay-ayatenna ti mangisakripisio iti relasionda tapno matalawanna ti kinarigat ti biag. Pinilina met ti agibales.

Iti isisinana iti gimong a saanen a mangawat kenkuana, lalo pay a nagpakadakes ni Boy Kobra. Nagbalin a a gun-for-hire. Ad-adun ngem ti bilang dagiti ramayna ti pinaipakni ni Mayor Santos Diagpaabac kenkuana.

Asino ti makalipat iti panangpapatayna iti kalaban a kandidato ti mayor? Tengnga ti aldaw ken madama ti panagbitla ti biktima. Dupudop dagiti tao.

Awan a pulos ti mangipagarup nga isuna ti dungrit nga agpalpalama a mangitangtanggaya iti aglatlati a lata iti tunggal tao a masabatna tapno makaasideg iti entablado. Apaman a naasitganna ti targetna, dagus nga inasutna ti pistola iti uneg ti nangirngir a pagan-anayna. Nagallungogan ti kanalbuong ti paltog iti walo a daras. Naibunubonda amin iti nadumaduma a paset ti bagi ti biktima a nakagsatanna a dagus. Awan ti naaramidan dagiti badigard gapu iti panagkakaribuso dagiti tao. Simmurot a nagtaray iti arimutong agingga a nailinged iti nagkurusan ti dalan a pagur-urayan dagiti tao ni Diagpaabac a mangitulnog kenkuana iti safehouse.

Agur-urayen iti safehouse ni Diagpaabac. Napalalo ti ragsak ti mayor iti resulta ti misionna.

Nalaingka a talaga Kobra. Rangerka a talaga ha! ha! ha!” intapik ti mayor kalpasan ti panangitupakna iti sangareppet a kuarta iti sanguanan ni Boy Kobra.

Addayta ti bonusmo iti pannakaikkat a balanganko ni Aguimbag. Ita, awanen ti kasangok. Agtalinaedak a mayor iti daytoy nga ili! ”

Kunak no siak laeng ti dakes, Mayor, adda gayam kaduak a mauram sadi impierno ti kararuana!” inngirsi ni Boy Kobra ket nagdanggay ti katawada a nangburak iti ulimek ti naiputputong a safehouse iti igid ti baybay.

(Maituloyto)

Comments are closed.