Footer

Task Force A(H1N1), nabukel

CANDON CITY – Nagtignay ti city health office ditoy tapno malapdan ti panagraira iti A(H1N1) virus ditoy siudad babaen ti panangbukelna iti maysa a task force.

Segun ken ni Dr. Osias Diasen, chair ti committee on health ti sangguniang panlungsod ditoy a kabinnadang ti Task Force A(H1N1) ti Barangay Health Emergency Response Team (BHERT) a mangmonitor iti nasao a virus ken mangisayangkat iti advocacy ken information dissemination kadagiti agindeg ditoy siudad mainaig iti nasao a sakit.

Naangay ti maysa a miting itay nabiit a dinar-ayan dagiti health officials iti region ken ditoy siudad, ni Diasen, dagiti opisial ti DepEd Candon City, ken dagiti opisial dagiti nadumaduma a pagadalan iti siudad tapno maiwayat dagiti addang tapno malapdan ti panagwaras ti A(H1N1) iti siudad iti sanguanan ti pannakaduktal a maysa nga estudiante iti maysa a pagadalan ti siudad ti nakakitaan iti sintomas ti nasao a sakit.

Naammuan ken ni Dr. Narciso Ramos, city health oficer ditoy nga addan innem a nagpositibo iti A(H1N1) iti siudad.

Kinuna ni Ramos nga agturong ti task force kadagiti barbarangay a mangpareaktibo iti BHERT, kasta met a mangisayangkat iti orientasion, mangmonitor kadagiti lugar a maatap a nakakitaan kadagiti agnaed iti sintomas ti nasao a sakit ken mangiwayat iti sistema ti panagsiput tapno maireport a dagus dagiti posible a kaso ti A(H1N1).

Idi Hulio 17 ken 20, nasuspendi ti klase ti St. Joseph Institute ditoy siudad kas precautionary measure kalpasan a nagpositibo ti maysa nga estudiante ditoy a pagadalan iti A(H1N1).

Mapapati a naala ti biktima ti sakitna iti kaarrubada a naggapu iti sabali a pagilian.

Dagiti sumaganad dagiti mangbukel iti task force: Dr. Osias Diasen, chairman; Dr. Narciso Ramos, Jr., vice chairman; ken da Ms. May Belardo iti DOH, Dr. Rolando Maranion iti City Veterinary Office, Victoria Ramos, CLGOO, Col. Emmanuel Reyes ti PNP, Jorge Reinante, City Schools Division Superintendent, Noel Singson, Liga President ken Grace Ragandap, nurse-coordinator ti communicable diseases kas kamkameng.

Na-reactivate ti BHERT idi 2003 para iti information dissemination idi nagraira ti Severe Acute Respiratory Syndrome.#