Footer

CAFC, aglako iti karne ti baboy iti nalaklaka a presio

VIGAN CITY- Panggep ti City Agriculture and Fisheries Council ditoy siudad ti agparti ken aglako iti karne ti baboy iti nababbaba a presio ngem dagiti tagilako dagiti meat vendors iti tiendaan publiko ditoy.

Daytoy ti naipalaon iti report ni Committee on Agriculture Chair Andres Adriatico iti Konseho ditoy siudad itay nabiit, mainaig iti napagnunummuan iti miting nga inangay ti CAFC itay nabiit.

Kinuna ni Adriatico a mismo a ti CAFC ti aggatang iti baboy manipud kadagiti hog raisers ditoy siudad, partienna daytoy sana ilako iti presio a P150 kada kilo.

Mailaklako iti karne ti baboy iti tiendaan publiko ditoy iti P160 kada kilo.

Kinuna ni Adratico a daytoy ti napagnunummuan iti nasao a miting iti sanguanan ti saan a panangtungpal dagiti meat vendors ti karida nga ipababada ti presio ti lakoda a karne ti baboy iti kanito a bumaba ti presio dagiti magatang a baboy.

Innayon ti konsehal a limmaka ti mailako a live weight a baboy ket rumbeng koma nga ipababa metten dagiti meat vendors ti presio ti lakoda a karne iti tiendaan.

Iti napalabas, ingngato lattan dagiti meat vendors ti lakoda a karne ti baboy iti P160 kada kilo iti baet nga awan pay ti pammalubos manipud iti konseho ditoy.

Insubli dagiti meat vendors ti presio ti karne ti baboy iti P150 kada kilo kalpasan a nagballaag ti konseho a makasuanda iti panaglabsing iti linteg gapu iti dida pananguray a maaprubaran ti petisionda.

Nupay kasta, inaprubaran met laeng ti konseho ti pannakaipangato ti presio ti karne ti baboy a mailako iti tiendaan iti P160 kada kilo.

Kinuna ni CAFC Chair Mel Aquino nga impadasda ti nagparti iti baboy idi Hulio 29 ngem impauragada kadagiti empleado ditoy siudad agsipud ta awan pay paglakuenda iti puestoda iti tiendaan.

Manamnama a mapinal ti napagnunummuan ken nasaysayud nga operasion ti panagnegosio ti CAFC babaen ti sabali pay a miting.#

Comments are closed.