Footer

INDAYON NI LAGIP: Dagiti Piglat iti Biagko (Maudi a paset)

Maysaak kadagiti naruay nga agbasbasa iti daytoy a pagiwarnak. Makunak a makalinglingay daytoy ken makaited adal kadagiti padak nga agbasbasa. Gapuna a natukay met ti riknak a mangibinglay iti daytoy a kapadasak maipanggep ken ayat. Ayat a nagbalinen a paset ti biagko.

Awagannak laeng iti Marinelle. Agtawenak iti 22 ken residenteak iti siudad ti Candon. Agtrabtrabahoak idiay Tagudin, ILocos Sur.

Manong Danny, sublianta ti tawen 2005. Daytoy a tawen a nagbalin a nobiok ni Jayson. Inauna ni Jayson iti dua a tawen ngem siak. Agbasbasa iti BS Nursing idiay siudad ti Baguio. Addaak met idin iti maikadua a tukad ti kolehio iti Edukasion ditoy Candon.

Nupay aginnadayokami iti pagad-adalan, dinominggokami nga agkita ta tunggal Sabado nga agawid ditoy Ilocos Sur basta awan ti dutyna. Ditoy balaymi ti ayuyangna tunggal bakasionna. Masansan nga awisennak a mapankami agbuya iti sine wenno mangan iti restaurant iti siudad. Namaris ti aldawko no kadennak ni Jayson.

Nagturpos ni Jayson idi Marso 2006. Iti panagturposna, naragsakannak ta magawgaw-atnan ti arapaapna iti biag.

Saanen a nageksamen ni Jayson iti board. Inasikasona ketdi dagiti papelesna nga agabrod. Apagbiit ti ipapanna ta tinulongan dagiti kakabagianna.

Idi agluas, inkarina a dinto agbalbaliw ken masansan a tumawag.

Agsingsingpetka, urayennak,” nakunana.

Dagita dagiti balikas nga imbatina, Manong Danny. Balikas a nagkammatalekak bayat ti kaawanna iti dennak.

Dagiti immuna a bulan manipud napan iti abrod, masansan a tumawag kaniak. Adu ti pagsarsaritaanmi. Kas iti arapaapna a panagkasarmi inton makaurnong. Ur-urayek dayta nga aldaw, nakunak kenkuana.

Dua a tawen ti naglabas. Maysa nga aldaw idi Mayo 2008, timmawag kaniak ket imbagana ti panagbakasionna iti Hunio. Diak mailadawan ti ragsakko iti daydi nga imbagana, Manong Danny.

Simmangpet ni Jayson ditoy Candon idi Hunio 3, 2008. Inur-urayko a sumarungkar ditoy balay ngem saan man laeng a timmammidaw uray apagkanito laeng.

Adu ngata ti simmarabo,” nakunkunak iti nakemko.

Ngem makalawas kalpasan ti isasangpetna, diak pay nakita uray anniniwanna. Uray dagiti tawagko iti selpon, dina met sungbatan. Dikon maigawid ti isasangbay ti panagduaduak. Agsisimparat dagiti saludsod iti panunotko. Ti makadakes, adda mabukbukel nga amak iti barukongko.

Kayatko koma ti mapan iti balayda ngem nagbainak. Amangan no kunanto pay ketdi dagiti kakabagianna nga idanonko ti bagik.

Nasungbatan ti ngatangatak idi maysa a kaarrubada ti nagpadamag a dandanin agkasar ni Jayson. Kasla diak patien iti dayta a nangegko, Manong Danny. Ad-addan ti pannakaplengko idi maammuak a ni Paula, ti nasinged a pagayamko, ti asawaenna!

(Adda tuloyna)