Footer

OPINION: Alegasion dagiti retailers a cartel ti makagapu iti kinangina ti bagas, saan koma a maipalpaliwaweng

Sumagmamano a babassit a rice retailers ken aglaklako iti bagas iti Siudad ti Baguio ti nangidagadag iti gobierno ti panangipakatna koma iti kontrol iti presio ti komersial a bagas tapno saan daytoy a kasla lobo a sumuyop ti kanginana a pakadagsenan dagiti umili nangnangruna dagiti sangkasapulan-sangkaapuyan.

Idi napan a tawen, nakitatayo ti kaatiddog ti pila dagiti umili tapno laeng makagatangda iti sumagmamano a kilo ti bagas kadagiti tienda a pakailakuan ti bagas ti National Food Authority.

Napasamak daytoy agsipud ta idi napan a tawen, kasla simmuyop ti presio ti komersial a bagas gapu iti food crisis a pinarnuay ti panagkisang daytoy a taraon iti world market.

Ngem iti agdama, nupay nagkulpan ti krisis, nangina met latta ti commercial rice.

No apay a kastoy, alegasion dagitoy babassit nga aglaklako ken traders nga adda rice cartel ditoy a pagilian nga impasdek dagiti dadakkel ken nabileg a rice millers ken negosiante kadagiti probinsia a dadakkel ti produksionna a bagas a kas iti Rehion II ken III.

Segun kadagitoy babassit a retailers ken traders, makontrol ti rice cartel ti presio ti bagas babaen ti panangibuntogda iti dakkel a volume ti bagas iti maymaysa laeng a trader ket daytoy laeng ti mangsuplay kadagiti sumagmamano a middlemen a gumatangan dagiti babassit a retailers ken traders iti ilakoda iti tiendaan wenno iti puestoda.

Gapu iti daytoy, no ania ti ituyang ti cartel a presio ti bagas, isu ti ipasa ti nasao a trader kadagiti middlemen ket agsipud ta awan met ti sabali a paggatangan dagiti babassit a retailers ken traders, saanda a makapagkitakit iti maituyang a presio nga agtungpal a nakanginnginan no mailakoda kadagiti tattao.

Maaramidda latta daytoy ta uray aggatang ti NFA iti irik, agpatingga laeng iti 10% iti amin nga apit ditoy pagilian ket di ngarud makagudil agsipud ta agtungpal ti kadakkelan a volume ti produksion dagiti dadakkel a rice-producing provinces iti ima ti sumagmamano laeng a rice millers ken negosiante.

Uray met agangkat ti gobierno iti bagas manipud iti sabali a pagilian, saan met a makaipababa daytoy iti presio ti commercial rice agsipud ta kas nakuna ti maysa a nangato nga opisial ti Department of Agriculture, naiwayat laeng tapno masulnitan ti 10% a pagkurangan ti apit ti pagilian a mangsuplay iti kadagupan a kasapulan a taraon para kadagiti umili.

Mainayon pay ditoy ti alegasion dagiti babassit a retailers ken traders nga imbes a dagiti nakurapay nga umili ti mabenepisiaran iti angkaten ti gobierno a bagas, mapapati a dakkel a volume ti agtungpal kadagiti dadakkel a bodega dagiti dadakkel a rice millers ken traders ket mailaokda kadagiti commercial rice babaen ti pannakikumplot dagiti personnel ti NFA met laeng sada mailako a kas kormersial a bagas iti nanginngina a presio.

Mabalin a paglibakan dagitoy dagiti taga-NFA ngem kapaliiwan iti kallabes kadagiti naraut a warehouses ti kaadda dagiti awanen ti naggianna a sako a namarkaan iti nagan ti nasao nga ahensia. Napanan ngarud dagiti linaon dagitoy sinaksako a bagas? Uray nengneng nga umili, ammona ti kinapudno a no adda makita nga asuk, adda apuy.

Pudno man ken saan dagitoy nga alegasion dagiti babassit a retailers ken traders, rumbeng nga ipaayan ti gobierno iti naan-anay nga imatang. Saan nga agannay dagiti babassit a retailers ken traders no dida maapektaran unay iti kangina daytoy a tagilako a kangrunaan a taraon dagiti Filipino.#