Footer

Bangko, natakawan iti tengnga ti aldaw

CANDON CITY- Sinerrek dagiti mannanakaw ti maysa a rural bank ditoy iti tengnga ti aldaw ket kinasakasda ti agdagup P500,000.

Uppat a lallaki ti nangisayangkat iti panagtakaw iti Rang-ay Rural Bank ditoy iti tengnga ti aldaw a kaawan dagiti kustomer ket intarayda ti P500,000 a kinasakasda iti teller.

Segun iti maysa nga agnaed ditoy a dina kayat ti painaganan, naplano a naimbag ken kasla military operation ti pannakaisayangkat ti panagtakaw ta naaramid iti apagbiit a tiempo a mapattapatta a nagpaut iti nakurang a lima a minutos laeng.

Naammuan iti imbestigasion a simrek ti dua a lalaki iti bangko a nagpamarangda a kustomer. Dua a kaduada ti nagbati iti ruar ket nagbalinda a lookout.

Idi addan dagiti dua a mannanakaw iti uneg, dinis-armada ti security guard a ni Glenn Alipda, 26, residente iti Bugnay, ditoy met laeng siudad, innalada ti paltogna sada imbilin iti teller ti panangitedna amin a naggian iti kahana.

Naglibas dagiti mannanakaw babaen ti motorsiklo. Awan ti ania a matatao iti uneg ti bangko ta lunch break idi naisayangkat iti panagtakaw.

Segun pay iti report, mapapati nga awan ti alarm device ti nasao a bangko. Nagresponde dagiti polis ngem nakaadayon dagiti mannanakaw.

Kabayatanna, kinuna ti polis nga addan naaramid a cartographic sketch iti maysa kadagiti mannanakaw.#