Footer

BANNER NEWS: Floor price ti tabako matuonan P32/kilo, kiddawen mannalon iti tripartite confab

VIGAN CITY- Manamnama a kumiddaw dagiti agmulmula iti tabako iti dakdakkel a maituon iti presio ti tabako iti masungad a tripartite meeting a maangay iti maudi a lawas ti Septiembre ita a tawen.

“Ti idadakkel ti presio ti kita dagiti mannalon iti tabako ti kangrunaan,” daytoy ti nagbalin a bugas ti panagsarita ni Gov. DV Savellano bayat ti naangay a pre-consultative conference mainaig iti maisingasing a floor price ti tabako a naangay iti provincial capitol itay Agosto 26.

Immatendar iti nasao a kumperensia a naangay babaen ti initiatibo ti gobierno probinsial dagiti agmulmula iti tabako, dagiti pannakabagi ti National Tobacco Administration tapno pagtitinnulonganda no ania ti idatagda iti masungad a tripartite conference a panagsasango dagiti stakeholders ti tobacco industry a pakairamanan dagiti agmulmula iti tabako, dagiti traders ken dagiti manufacturers ken ti NTA.

Napagtitinongan dagiti mannalon a P31.20 ti dawatenda a maituon iti floor price ti tabako iti tripartite conference.

Idi 2007, nagbalin a P61 ti floor price ti tabako kalpasan nga immanamong dagiti traders ken agparpartuat a matuonan iti P10.

Iti napalabas a tobacco season, immabot ti presio ti tabako iti nasurok a P90 para iti class A a tabako ken P50/kilo para iti reject.

Kiniddaw ni Savellano kadagiti agtuturay ti NTA nga ipangrunada koma nga ikkan iti importansia no kasano a sumayaat ti kalidad dagiti bulong ti tabako.

Kinunana a masapul a takuaten dagiti eksperto iti NTA no kasano a mapaadu ken umatitiddog dagiti binulong ti tabako a mangitunda iti dakdakkel a mapastrek dagiti mannalon.

Innayonna pay a rumbeng a maipababa ti gastos ti produksion kangrunaanna iti mausar a ganagan ken insektisidio ken ti pasnnakapatalinaed ti natibker a presio dagiti partuat a bulong ti tabako.

Indagadag ti gobernador a tumulong koma ti NTA iti pannakabangon dagiti pugon a mausar iti panagluto iti birhinia a tabako gapu ta medio nadagsen ti mabusbos dagiti mannalon iti pannakaipatakderda.

“Adda pondo ti ahensia iti pannakabangon ti paktoria iti tobacco dust iti Sto. Tomas, La Union. Kayatna ngarud a sawen nga adda met umdas a pondo ti NTA tapno matulongan dagiti mannalon. Kas parte ti gobierno probinsial, madadaankami a mangipaay iti kanayonan a pondo kas counterpart,” impatalged ni Savellano.

Kabayatanna, indagadag ni Mayor Benjamin Sarmiento a dagiti koma mannalon ti ipangpangruna ti NTA imbes nga ibautna ti pondo iti pannakaipatakder iti planta.

Sakbay ti tobacco summit nga inlungalong ni Gov. DV Savellano idi 2007 P2 laeng ti maitutuon iti floor price iti tabako.

Iti isasarungkar iti gobernador iti China, natakuatanna a P200 kada kilo ti paggatgatang dagiti traders sadiay ti tabako. Uray ni Cong. Eric Singson, impalgakna a kasta met ti presio ti tabako kada kilo iti Malaysia.#