Footer

Culinary arts ni Ilokano, naitampok iti Chefs on Parade

VIGAN CITY – Potahe Ilokano ken siglat iti culinary arts ti naidasar iti dua nga aldaw a Chefs on Parade a naangay idi Agosto 20-21 babaen ti panangesponsor ti Ilocos Sur Hotels Restaurants and Related Enterprise Association (ISHORE) ken iti pannakitinnulong ti gobierno probinsial ti Ilocos Sur, Heny Sison Culinary School ken San Miguel Purefoods.

Gagem ti nadakamat nga event a masubok ti laing dagiti estudiante a mangal-ala iti kurso a Tourism ken HRM kasta metten dagiti F&B professionals manipud kadagiti nasurok 60 nga establisimiento a kameng ti ISHORE.

Kinuna ni Gov. Deogracias Victor “DV” Savellano, agpapaay a chairman ti ISHORE nga iti uppaten a tawen a panangang-angayda iti Chefs on Parade, dakkelen ti ngimmatuan ti kalidad ti serbisio nga ipapaay dagiti adda iti hospitality industry idinto nga adu dagiti estudiante a naguyugoy nga agenrol iti Tourism ken HRM a kurso.

Karaman a makasursuro ditoy dagiti trainors tapno sumayaat met ti kalidad ti panagisuroda, isu a namnamaek nga innalada daytoy a gundaway tapno mapapintasda pay dagiti aramidda,” kinuna ni Savellano.

Mairaman kadagiti on the spot a napagsasalipan ti panagluto iti potahe ken dessert, arte, siglat ken serbisio a nagpaayan dagiti nalalatak a chefs ken mangimaton iti agduduma a foods magazines iti Metro Manila a kas hurado a pakaibilangan da Heny Sison, Nick Rodriguez, Vicky Villanueva, Vivian Syyap, Glenn Ramorca, Boy Vasquez, Katherine Sion, Jey Herrera, Jason Stacy, Dolly Dy, Jenny PeHa, Carlos Palma. Socorro Llamas, Nana Ozaeta ken Rafael Zulueta.

Dumalan iti makalawas a panagsanay dagiti nangabak para iti national level competition iti Baguio City inton Setiembre 10-12.

Naangay met idi Agosto 22 ti agmalmalem a culinary tour para kadagiti chefs ken mannurat iti foods magazines tapno maipakita dagiti lokal a makan iti Ilocos Sur. Karaman kadagiti pinasiarda ti pagaramidan iti empanada, bagnet, longganisa, royal bibingka ken chichacorn.

Babaen ti panagpasiarda, maipablaakto dagiti produktotayo kadagiti agduduma a magasin a makatulong tapno maam-ammo ti probinsiatayo a kas culinary destination,” kinuna ti gobernador.

Kabayatanna, maiyalnag iti mabiit ti libro a “NAIMAS” a nakailanadan dagiti amin a potahe, makan, kankanen, ken mainum a masarakan iti Ilocos Sur babaen ti panangisurat ni Chef Heny Sison.#

Comments are closed.