Footer

EDITORIAL: Panangsalikawkaw iti linteg

Iti daytoy a tiempo a kinarigat ti biag, saan a maaluadan ni marigrigat a Pilipino ti agsanamtek no madamagna iti kinalang-ay dagiti opisial ti gobierno a kasla ketdin awan ti kaes-eskan ti kuarta iti nabarayuboy a panaggastoda.

Itay laeng nabiit, nagsagrap ti gobierno Arroyo iti adu a pammabalaw gapu iti nairakurak a pannakagasto ti nakurang a P2 milion iti dua laeng a pangrabii iti maysa a class a restaurant iti New York ken Washington D.C. iti Estados Unidos.

Ngem iti baet daytoy, nagiinnuna dagiti kaaliado ti Presidente a nangikalintegan iti pannakagasto iti kasta kadakkel a pirak. Ngem uray kasano a panangdepensada iti napasamak, saan a mailinged ti kinapudno a saan a nasayaat a denggen ti kinabarayuboy dagiti agtuturaytayo iti baet a riwriw dagiti kailianda ti dida ammo ti pangalaanda iti sumaruno nga apuyenda.

Ita, sabali manen a damag ti mangibando nga awan san ti delikadesa dagiti agtuturaytayo iti panaggasto iti pondo ti gobierno.

Iti maysa a report manipud iti Commission on Audit, agdagup iti P117.77 milion a kuarta ti gobierno ti nagastos kadagiti infomercials dagiti hepe dagiti nadumaduma nga ahensia ti turay.

Nupay kasta, inlawlawag ti COA a saan pay a maibilang daytoy a dagup ti nagastos gapu ta adda dagiti opisina a dina pay inodit agsipud ta awan pay ti insubmite dagiti auditor dagitoy a disbursement, voucher wenno kontrata para kadagiti infomercials.

Itay laeng lawasna, nakitatayo ni Sen. Miriam Defensor-Santiago, kurang la nga agasuk ti agongna iti panangbabalawna kadagiti opisial ti turay nga addaan iti infomercial iti telebision.

Makaipas ti balikas ni Santiago: no saan a bulsek, tuleng, wenno nengneng ti tao, nalawag a dagiti mapapati nga infomercials dagiti cabinet members ket nairanta a mangkalub iti panaglabsingda iti campaign ban, gapu iti simple a rason a dagitoy a cabinet members ket ipakpakatda dagitoy nga infomercials iti tawen sakbay ti election year ken saan nga iti sabali a tiempo, saan a para iti sabali a rason no di personal a publisidad a politikal.”

Mamatikami iti kinuna ti senadora a dagitoy nga infomercials ket pammarang nga aramaten dagiti nga agkandidato nga agkampania a nasapsapa ngem dagiti sabali nga aspirante a kandidato idinto nga innayonna a babaen ti panagaramat dagitoy nga opisial ti gobierno iti pondo ti publiko, maaddaanda iti pinansial a mekanismo nga agkampania a nasapsapa ngem dagiti dadduma.

Inyunay-unay pay ni Santiago a sinalungasing dagiti infomercials ti Code of Conduct and Ethical Standards for Public Officials a mangibagbaga a maaramat amin a sanikua ti gobierno nga episiente, epektibo, nadalus, nainut, partikular tapno malapdan iti wastage iti pondo a publiko ken pamastrekan.

Uray saan nga ibagbaga ti senadora, ammon dagiti umili a dagitoy nga infomercials ket pangsalikawkaw iti election ban.

Ipakpakita laeng daytoy nga awan ti delikadesa dagiti sumagmamano nga agtuturaytayo ket madadaanda a mangaramid amin a pamuspusan tapno matungpal ti panagtalinaedda iti puestoda wenno panagpanggepda iti nangatngato a puesto.

Ngem ti problema, denggen kadi dagitoy a public officials ni Miriam?

Dayta, kailian, ti danog iti bulan a tartarigagayan ti senadora a mapagteng.#

Comments are closed.