Footer

INDAYON NI LAGIP: Iti Nagkurusan ti Biagko (Tuloyna)

Sumagmamano a rabii a sinangsangitak ti pannakapukawko ken ni JM, Manong Danny. Sabali manen a pannakapaayko iti ayat.

Timmawag ni JM ket kiniddawna nga agkitatakami. Ngem imbagak a saanen a nasken nga agpalawag pay ta ginulibannak. Kadagiti simmarsaruno nga itatawagna, saankon a sinungbatan.

Inkeddengko ti umadayo tapno manglipat. No aggianak ditoy, maipalagipto laeng kaniak ni JM, dagiti naragsak a kanitomi iti biag.

Nagturongak iti siudad ti Baguio. Nakastrekak iti trabaho, saleslady iti maysa a department store. Uppat a bulanko idiay.

In-inutko met laeng a nalipatan ni JM. Kastay kunada, ti sugat uray kasano ti kaunegna, aglunitto met laeng.

Kalpasan iti uppat a bulan, nagsubliak ditoy Candon City. Pinalabasko ti umuna a dua nga aldawko a nagpasiar iti siudad.

Ngem diak ninamnama nga agkitakami manen ken ni Jayson. Ad-adda a timmaer ni Jayson. Diak ammo ngem adda manen nakulding ditoy kaunggak.

Inawisnak ni Jayson a mangaldaw iti maysa a restaurant. Diak ammo no apay a pinatgak nupay ammok nga addan kaingungot ni Jayson.

Adda videoke bar ti restaurant. Adda sumagmamano nga agkakanta. Bayat ti pannanganmi, dita a naipalagip ti napalabasmi. Sinublat ni Jayson ti mikropono. Kinantana ti Sometimes When We Touch, sana insaruno ti pagaayatko a kanta a Kung Sakaling Ikaw Ay Lalayo.

Bayat ti panagkantana, nakapigpigket ti panagkitana kaniak. Kasla malunagak iti perrengna. Kayatkon ti tumakder ngem kasla nailansaak iti nagtugawak.

Malemen idi nagsinakami. Piniselna ti dakulapko ket inyarasaasna a kayatna nga agkitakami manen iti sumaruno nga aldaw. Diak sinungbatan, dinagdagusko ketdi ti limmugan iti traysikel.

Iti dayta a rabii, nakaawatak iti tawagna. Imbagana a saan a naragsak iti denna ti asawana. Naamirisna kano a siak pay laeng ti ipatpategna.

Kayatko nga agkitata manen,” nakunana.

Dinagdagusko nga iniddep ti selponko.

Kadagiti simmarsaruno nga aldaw, agsasarunon ti panagteks ni Jayson. Tumawag payen no dadduma. Imbaga ni Jayson a no agsinnublianankami, ilakadna ti papelesko ta sadiayen Amerika ti pagdennaanmi. Mariknak a matinnag manen ti riknak ken ni Jayson.

Manong Danny, diak ammo ti aramidek. Mariribukannak.

Ti laengen idawdawatko iti Namarsua, sapay koma ta nalawag latta ti panunotko tapno diak masulisog a mangpatgan iti kalikagum ni Jayson. Sapay koma ta masurotak ti rumbeng nga aramidek. Iti agdama a nagkurosan ti biagko, diak ammo no ania ti surotek a dalan. Agpakannawanak kadi, iti dalan nga umadayo manen? Wenno agpakannigidak, a mangsurot iti dalan nga agturong ken ni Jayson?

Ala kastan, Manong Danny, sapay la koma ta ikarkararagandak dagiti mangtartarabay iti daytoy a programam tapno masurotko ti umno a dalan.

Toy pagayammo

Marinelle

Candon City

Comments are closed.