Footer

Mannalon iti Barangay Bulala, nalayus ti talonda gapu iti kontruksion iti Mindoro airport

VIGAN CITY – Sumagmamano a mannalon iti Barangay Bulala ti malaylayus ti taltalonda gapu iti agdama a proyekto a pannakapasayaat ti eropuerto iti Mindoro ditoy a siudad.

Kanaig daytoy, kinuna ti bise mayor ditoy a nagtignay ti city government tapno matulongan dagiti naapektaran a mannalon iti nadakamat a barangay.

Kinuna ni Vice Mayor Franz Ranches nga impresentarna ti nasao a problema iti chairman ti committee on agriculture tapno maaramid ti maysa a resolusion para iti pannakasolbar ti nasao a problema dagiti mannalon.

Kinuna ti bise mayor a kas addang ti sangguniang panlungsod, pakaammuanda ti Department of Transportation and Communication ken ti kontraktor tapno mangiyussuatda iti aksion para iti pannakasolbar daytoy a problema dagiti mannalon.

Innayon ti bise mayor a dumatag iti sumaruno a session ti kontraktor ken ti DOTC agraman dagiti naapektaran a mannalon tapno marisut ti problema dagitoy.

Naammuan ken ni Ranches a kangrunaan a naapektaran dagiti mannalon iti pasetna iti Bulala gapu iti pannakalaylayus dagiti talonda.

Kabayatanna, kinuna ti bise mayor a maitantan pay laeng ti pannakaipangato ti renta dagiti adda puestona iti public market annex agingga iti Disiembre daytoy a tawen.

Kiniddaw dagiti negosiante a maitantan pay laeng ti panangipakat ti city government iti nangatngato a renta iti up-upaanda nga stall iti public market annex agingga iti agtapos daytoy a tawen.

Segun ken ni Ranches, nagbaliw ti kapanunotan ni Konsehal George Villanueva ket mangaramid iti ordinansa a mangamendar iti Revenue Code idinto a kayat ni Konsehal Benjoe Verzosa a mangaramidda iti resolusion a mangted iti otorisasion ken ni Mayor Eva Marie S. Medina a mangsuspenso iti pannakaipangato ti renta dagiti stalls iti public market annex.

Kinuna ti bise mayor nga urayenda ti pannakaidatag ti resolusion ken ordinansa tapno isayangkatda ti diskusion no ania ti aksion a surotenda.#

Comments are closed.