Footer

Outreach program, naisayangkat iti nasulinek a lugar ti Baybayading

SALCEDO, Ilocos Sur – Sabali pay nga outreach program ti naisayangkat iti maysa a nasulinek a barangay ditoy itay nabiit.

Insayangkat ti Citizens Involvement and Services (CIS). DZTP Radio Tirad Pass, Bantay Barangay ken Mason ti nasao nga outreach program idi Agosto 21.

Sakbayna, itay napalabas a lawas, nagiwaras iti school bags kadagiti agbasbasa iti elementaria iti San Emilio, Banayoyo ken Lidlidda, Ilocos Sur.

Nagiwaras ti grupo iti bags ken ag-agas a naggapu iti provincial government, ididnto a used clothes, school uniforms ken school supplies manipud iti DZTP ken Mason kadagiti agindeg iti Barangay Baybayading, agram dagiti agbasbasa iti Baybayading Elementary School.

Nagna ti grupo manipud iti Poblacion ditoy, partikular ti Balidbid iti aganay dua nga oras a kasapulan ti sumang-at iti bantay sakbay a makadanonda iti nasao a barangay.

Addaan laeng ti Baybayading Elementary School iti 20 nga estudiante, dua a mangisursuro iti multi-grade manipud Grade I agingga iti Grade IV.

Linagidaw ni Noemi La Torre, maysa kadagiti dua a mangisursuro ti panagsardeng dagiti ubbing nga agbasa no malpasda ti Grade IV gapu iti kinaadayo ti pangituloyanda iti adalda iti Grade V ken Grade VI agraman iti high school.#