Footer

Pannakaisuro ti kannawidan, kultura dagiti tribu, agtultuloy

BANAYOYO, Ilocos Sur – Agtultuloy ti pannakaisuro dagiti kannawidan a sala, kanta ken tokar kadagiti agbasbasa iti School of Living Tradition, segun iti coordinator iti nasao a pagadalan.

Iti pannakiuman ti media ken ni Minerva Famorca, coordinator ti SLT a naipasdek iti Barangay Naguimba ditoy nga ili, kinunana nga addadan iti phase two ti panagadal dagiti ubbing a nangrugi idi Mayo 2009 ket agpatingga inton Oktubre iti daytoy met laeng a tawen.

Inlawlawag ni Famorca a kadawyan nga isursuroda kadagiti ubbing dagiti kankanta, sala ken panagtokar iti musical instrument ti tribu a Bago.

Iti daytoy a tawen, dagiti adda 30 a nag-enrol iti iti School of Living Tradition nga agbasbasa iti Grades 2, 3 ken 4, kinuna ni Famorca. Agbasa dagiti ubbing iti aldaw ti Sabado ken Domingo, segun iti coordinator.

Pinunduan ti National Commission on Culture and the Arts (NCCA) ti SLT a gagemna ti mangtaginayon kadagiti nagkauna a salsala, kankanta ken musika dagiti nadumaduma a tribu iti kabambantayan.

Nairusat ti SLT ditoy idi 2006. Adda itan iti sekundaria dagiti immuna a nagturpos iti SLT.

Kinuna ni Famorca a naigunamgunam kadagiti agbasbasa iti SLT ti panangiparangarang ken panangipabuyada iti kultura ken kannawidanda no adda okasion.#