Footer

Sektor pribado, gobierno probinsial, agkammayet kontra A(H1N1)

VIGAN CITY – Kalpasan a nagdinamag ti kaadda ti kaso ti pandemic A(H1N1) iti maysa nga unibersidad iti probinsia, nagkakammayet dagiti grupo dagiti pribado a dodoktor a kameng ti Ilocos Sur Medical Society, volunteer barangay health workers, provincial health team office, gobierno probinsial ti Ilocos Sur, provincial ken municipal health offices tapno maprebentaran ti posible nga iyaadu dagiti maapektaran iti Ilocos Sur.

Kanaig daytoy, nabuangay ti maysa a task force a mangmonitor iti nadakamat a sakit babaen ti panangidaulo ni Bokal Gerry Lahoz, chairman ti committee on health iti hunta probinsial.

Kas umuna nga addang, nangangay ti task force iti maysa a lay forum para iti A(H1N1I idi Agosto 24 a nagpaayan ni Dr. Jaime C. Montoya a esource speaker para kadagiti amin a banag nga adda pakainaiganna iti A(H1N1) a pakairamanan dagiti rumbeng nga aramiden tapno maprebentaran ti itataud daytoy ken no ania ti aramiden no kinapet itoy a sakit.

Iti interbiona iti media, inlawlawag ni Gov. Deogracias Victor “DV” Savellano a ti prebension ti ad-adda a tutokan ita ti binuangayna a task force.

Nupay kasta, segun iti gobernador, madadaan ti opisinana a mangipaay iti kasapulan nga agas kadagiti kapten ti sakit no bilang addanton bakuna para iti AH1N1 virus.

Kabayatanna, impakaammo ti spokesperson ti task force ti UNP nga awan pay ti estudiante a nagpositibo ti A(H1N1) Virus kalpasan ti panangipakat ti pagadalan ditoy ti preventive measure iti dandani makalawas tapno di agwaras ti sakit.

Nupay kasta, kinuna ni Dr. Gilbert Arce, dadaulo ti Task Force A(H1N1) iti UNP a nupay awanen ti napaliiwda a nagpositibo iti nasao a virus, itultuloy ti nainget a pannakamonitor dagiti estudiante a sumrek iti pagadalan amangan no adda gurigorda.

Imbilin ni University of Northern Philippines President Dr. Lauro B. Tacbas ti pannakasuspende ti klase manipud Agosto 13 agingga iti 18 kalpasan a nakumpirmaran a nagpositibo iti A(H1N1) ti lima nga estudiante ti pagadalan nga agdagdagus iti maysa a dormitorio.

Bayat ti kaawan ti klase naisayangkat ti panagdalus kadagiti kuarkuarto ken aglawlaw ti pagadalan.

Maysa nga estudiante manipud Abra ti masuspetsa a nangiyalis iti sakit kadagiti lima a kaklaseanna.

Mapapati a nagpositibo iti A(H1N1) ti nasao nga estudiante ket naiyospital. Pinalubosan dagiti nagannak kenkuana a mapan agbasa iti UNP gapu ta namatida a naimbaganen daytoy.#

Comments are closed.