Footer

3 bangkay, nasarakan

CANDON CITY – Tallo a bangkay a pakairamanan ti maysa a bakla ti nagsasaruno a nasarakan itay nabiit iti tallo a lugar ditoy siudad.

Nasarakan ti bangkay ni Domingo Calvo alias Lovely, 38, maysa a bakla, mangimatmaton iti DJV Videoke Bar, iti barangay Paras, Candon City, ken natibo iti Bayugan, Agusan del Sur iti igid iti kabaybayan iti barangay Darapidap.

Segun iti report, pimmanaw ni Calvo iti videoke bar a nakalugan iti motorsiklona a Honda Wave ngem kabigatanna, nasarakan ti bangkayna a nagsagrap kadagiti pammagsol.

Panagtakaw ti motibo a palpalutpoten dagiti polis agsipud ta napukaw dagiti sumagmamano a gameng ti biktima.

Maysa met a bangkay ti menor de edad a mapapati a biktima met laeng iti pammagkong ti nasarakan iti bakante a lote iti Barangay San Antonio..

Nabigbig ti biktima a ni Jonathan Alonzo, 14, cigarette ken calamay vendor, out-of-school youth ken residente iti barangay San Isidro itoy a lugar.

Iti panagimbestiga dagiti polis, rimmuar ti biktima a di nagpakada iti inana ket nasarakan laengen ti bangkayna iti kabigatanna nga addaan iti bagsol iti barukong ken kannigid a paset ti bagina.

Kabayatanna, nasarakan ti bangkay ni Gregorio ‘Oloy’ Garrino, 70, balo, retired government employee, iti asideg ti pagtaenganda iti Barangay Tamurong 2nd.

Naammuan iti report a mapan koma mangruot ni Tito Gaoat, 61, residente iti nadakamat a barangay idi makitana ni Garrino a nakailad. Idi riingenna, natakuatanna a nalamiisen a bangkay daytoy.

Mapapati a naatake ti biktima ken awan ti foul play a napasamak.#

Comments are closed.