Footer

Dati a gobernador ti Abra, naiyalis iti pagbaludan ti Quezon City

QUEZON CITY – Naiyalis ti dati a gobernador a naitudo a mastermind iti pannakapapatay ti maysa a diputado iti Abra manipud iti Philippine National Police Custodial Center iti pagbaludan ditoy babaen ti pammilin manipud iti maysa a korte iti siudad.

Naiyalis ni dati a gobernador ti Abra Vicente “Vicsyd” Valera iti pagbaludan iti Quezon City kas maibatay iti commitment order nga inyisio ti Quezon City Regional Trial Court Branch 84, segun ken ni PNP spokesman Senior Supt. Leonardo Espina.

Sakbay ti pannakaiyalis ni Valera iti PNP Custodial Center, naikkan iti medical check-up gapu iti PNP General Hospital gapu iti complaintna a marigatan nga umanges.

Naaresto ni Valera idi rabii ti Septiembre 1 iti uneg ti kondominiumna iti Hidalgo Towers Rockwell, Makati City babaen ti nagtipon a puersa ti Quezon City Police District ken Makati Police. Kuna ti polis a kadua ni Valera ti asawana ken ti anakna a babai idi maaresto.

Ni Valera ti mapapati a mastermind iti pannakapapatay ni Diputado iti Abra Luis Bersamin, Jr. ken ti badigardna a ni SPO1 Adolfo Ortega iti sanguanan ti St. Carmel Church bayat ti itatabunoda iti maysa a kallaysa idi Disiembre 16, 2006.

Nakasuan ni Valera iti double murder ken frustrated murder, kaduana da Leo Bello, Jerry Torquesa ken Leo Burno iti Quezon City Regional Trial Court idi Pebrero 2006.

Adda naitanggaya a P250,000 a gunggona iti makaitudo iti paglemlemmengan ni Valera ken P100,000 para iti pannakaaresto ti badigardna a ni dati nga Army Sgt. Leo Bello.

Intudo dagiti gunmen a nangpaltog ken ni Bersamin ti dati a gobernador a mastermind iti nasao a pammapatay.

Ngem pinaglibakan ni Valera nga adda pannakainbolbarna iti nasao a krimen.

Mangnamnamaak a maited a husto ti hustisia… inosenteak iti krimen,” kinuna ni Valera.

Kinuna ni Rolando Quimbo, abogado ti dati a gobernador a mangipilada iti mosion para iti rekonsiderasion idinto nga innayonna a saan nga agpayso ti sayangguseng a naglemlemmeng ni Valera.

Segun met kadagiti nabatbati a supporters ni Valera, rummuarto met laeng ti kinapudno.#

Comments are closed.