Footer

Gabriela Silang General Hospital immawat kadagiti alikamen iti kusina

STA. CATALINA, Ilocos Sur – Nadumaduma a kitchen utensils ken cooking gears kas iti refrigerator, rice cooker, cooking range, pressure cooker, stand fan, exhaust fan, dining sets, kaldero, kaserola, ken dadduma pay a mausar iti kosina ti inawat ti hepe ti Gabriela Silang General Hospital bayat ti Kakailian nga Agnaed iti Barangay Sangsangkamaysa nga Agrang-ay Tayo wenno KABSAT Outreach Program kadagiti barangay ditoy nga ili idi Agosto 26.

Kinuna ni Dr. Winston Aguirre a mausar dagiti alikamen iti kusina nga agpateg iti P50,000 iti panangrugi manen ti dietary section ti ospital a mangisagana iti taraon dagiti pasiente imbes nga ipalutoda pay dagitoy.

“Babaen itoy a wagas, maipaaytayo dagiti umisu a taraon para kadagiti pasiente a mayataday iti kasasaad ti sagubanitda,” kinuna ti officer in charge ti GSGH.

Iti dayta met la nga aldaw, agduduma a ramit iti talon kas iti kuliglig with pumps, hose, agduduma a bukel ti natnateng, seed bags, piek a sasso, kasta metten iti monobloc a tugtugaw, tents, bagas, grocery items, rostrum, OB bags ken sarukod para kadagiti nataengan ti impaay ti Kakailian nga Agnaed iti Barangay Sangsangkamaysa nga Agrang-ay Tayo wenno KABSAT Outreach Program kadagiti barangay ditoy nga ili idi Agosto 26.

Saan met a naawan ti medical ken dental mission a nakaipaayan iti libre nga ag-agas ken bitamina idinto a naisayangkat pay ti agduduma a panagsanay para kadagiti barangay workers.

Inlawlawag met ni Savellano a saanen a kasapulan pay ti kanayonan a personnel iti panangpataray iti kosina ti Gabriela Silang General Hospital ta addan dagiti sigud a nadesignaran a nutritionists.

“Iti panagsardengda idi a mangisagana iti taraon dagiti pasiente, naipanda iti sabali a seksion ti ospital. Ita ta manglukat manen, isublitayo idan iti dati a puestoda,” kinuna ti gobernador.#

Comments are closed.