Footer

INDAYON NI LAGIP: Palimed (Umuna a paset)

Kayatko koma met nga ibinglay daytoy padasko iti ayat kadagiti agdengdengngeg kenka iti radio.

Manong Danny, awagannak laeng iti Mercy, agtawen iti 25, nagturpos iti kolehio ken agdama a sekretaria iti maysa a dakkel a kompania ditoy Candon. Saan a panangibuat iti bukodko a bangko, adu ti agkuna a napintasak. Kaarngik kano ni Lorna Tolentino ken agkaseksikami ken ni Marianne Rivera. Masansan a masiputak dagiti kaopisinaak, lalo dagiti babbaro, a mangkidkidday kaniak.

Wen, Manong Danny, balasangak pay. Kinapudnona, adu a kaopisinaak ti masmasdaaw no apay nga agingga ita awan pay ti nakaigalut kaniak.

Nengneng dagiti babbaro ditoy opisina,” nakuna naminsan kaniak ni Manong Anselmo, “adda ditoy abayda ti babai a pakaidayawanda nga isaklang iti altar, ngem iti pay la sabali nga opisina ti pagaroganda.”

Pamrayak laeng ti umisem no kasta a sutilennak ni Manong Anselmo.

Wenno napilika unay,” nakuna ni Manong Selmo.

Saan, Manong,” insungbatko. “Saan a ti langa ti birbirokek iti agbalin a katinnakunaynayko iti biag. Ti nasken, agpipinnategkami.”

Idi makapanaw ni Manong Selmo, dinumogak ti lamisaanko. Kinapudnona, addan tallo a kaopisinaak a nagarem kaniak. Immuna ni Andrew, ti accountantmi. Maraem ti pamilia ni Andrew. Awan ti bisiona. Ammok nga agbalinto a nasayaat nga asawa.

Ngem binastedko ni Andrew. Sinaludsodna no apay. Basta imbagak lattan a saannak pay a sisasagana a tumapog iti naestaduan a panagbiag.

Makaurayak met,” nakuna ni Andrew. “No aklonennak, ipanamnamak a sika laeng ti ay-ayatek.”

Agbalinta laeng koman nga aggayyem, Andrew,” nakunak.

Nupay ammok a nasakit ti nakemna, inawat ni Andrew ti pannakapaayna. Agingga ita, ammok a di pay naglunit ti sugat iti pusona.

Simmaruno ni Mark, web designer. Kas ken ni Andrew, awan ti pamilawak kenkuana. Nangato ti saadna ken ammok a natalgedto ti masakbayak kenkuana. Ngem pinaayko met.

Kaudian ni Ansel, marketing supervisor. Idi iparipiripna pay laeng ti ayatna, dinagdaguskon nga imbaga nga iti sabali koman a babai ti pangipaayanna iti imatangna. Manipud idi, saanen a simmarungkar pay ni Ansel iti kaserak.

Wen, adu ti masdaaw no apay nga awan pay ti kaayan-ayatko. Adda pay ketdin agsuspetsa a tomboyak. Sabali laeng ti nangsutil kaniak a “not the marrying kind”. Ngem ni Lulu, ti gayyemko, ti nakatugkik iti riknak idi imbagana a maysaak a man-hater.

Kayatko nga ibaga nga awan ti kinapudnona dagita nga ibagbagada. Normalak a babai. Ammok ken mariknak met ti agayat. No ammoda laeng koma ti palimed nga ik-ikutak!

Comments are closed.