Footer

Naing-inget a kampania maikontra iti loose firearms, agtultuloy: PRO1 regional director

SAN FERNANDO CITY – Kinuna ti PNP regional director ditoy nga agtultuloy ti naing-inget a kampania maikontra iti agraraira a paltog tapno madalusan ti rehion kadagiti loose firearms.

Itultuloytayo ti naing-inget a kampaniatayo maikontra iti agraraira a paltog kas panagrespondetayo iti direktiba ni PNP Chief Jesus Verzosa a mangsurot kadagiti agtagikua kadagiti saan a rehistrado a paltog ken dagiti nagpason ti lisensiada,” kinuna ni Gatan idinto nga innayonna a kasapulan a madalusan iti rehion kadagiti loose firearms aglalo ket umadani ti eleksion.

Kabayatanna, pinadayawan ni Gatan dagiti operatiba a nangisayangkat iti operasion a nakakumpiskaan dagiti sumagmamano nga armas ken balbala iti Alcala, Pangasinan idi Septiembre 1.

Inreport ni Police Senior Supt. Percival Barba, Pangasinan provincial director, a nakakumpiska dagiti nagtipon nga elemento ti Regional Mobile Group I, 107th Provincial Mobile Group, Alcala police, Sta. Barbara police ken ti Special Operations Group ti PPPO kadagiti nadumaduma nga armas kada Dionisio Castillo Jr., Cornelio Jose, Rodrigo Libed, and Rodrigo Oliferes, agpapada nga agnaed iti daytoy nga ili.

Nakakumpiska dagiti polis iti caliber 9mm Taurus pistol ken M16 armalite rifle nga addaan balbala manipud ken ni Castillo iti pagtaengan daytoy iti Barangay San Juan.

Karaman met dagiti nakumpiska kada Jose, Libed ken Oliferes, agpapada nga agnaed iti Barangay Sinabaan, ti maysa a caliber .45 pistol, caliber 9mm Taurus pistol, dua a shotgun, M16 armalite rifle, ken nadumaduma a balbala.

Nupay kasta, kinuna ti polis a natakuatanda nga addaan iti lisensia ti caliber 9mm.

Naisayangkat ti panagsukisok babaen ti search warrants nga inyisio ni Judge Ulysses Butuyan ti Regional Trial Court Branch 51 iti Tayug, Pangasinan maikontra kada Castillo, Jose, Libed, ken Oliferes.

Makasuan dagiti uppat iti illegal a panagikut iti armas ken ammunition.

Indagadag ni Gatan iti publiko ti pananggundawayda iti gun amnesty program a mangrugi iti Oktubre 1 agingga iti 30 idinto nga innayonna nga agaw-awatdan ken agprosproseso kadagiti aplikasion iti amnestia iti paltog kas maibatay iti programa ti gobierno a pannakontrol dagiti armas.#

Comments are closed.