Footer

Pannakaipangruna ti isasayaat ti kalidad ti tabako, naikiddaw iti NTA

VIGAN CITY – Kiniddaw ti gobernador iti National Tobacco Administration nga ipangrunada koma nga ikkan iti importansia no kasano a sumayaat ti kalidad dagiti bulong ti tabako.

“Ti idadakkel ti kita dagiti mannalon iti tabako ti kangrunaan,” kinuna ni Gov. Deogracias Victor “DV” Savellano bayat ti naangay a Pre-Consultative Conference on the Proposed Tobacco Floor Prices a naangay iti kapitolio idi Agosto 26.

Indagadag pay ti gobernador iti itutulong ti NTA iti pannakabangon dagiti pugon a mausar iti panagluto iti birhinia a tabako tapno di pay isu nga ibaklay a gastuen dagiti mannalon.

“Adda pondo ti ahensia iti pannakabangon ti paktoria iti tobacco dust iti Sto. Tomas, La Union, kayatna ngarud a sawen nga adda met umdas a pondo ti NTA tapno matulongan dagiti mannalon,” kinuna ni Savellano idinto nga innayonna a “madadaankami iti provincial government a mangipaay iti kanayonan a pondo kas counterpart”.

Kabayatanna, dinawat ni Andy Reyes, presidente ti Philippine Association of Tobacco-Based Cooperatives, ti panagkaykaysa dagiti mannalon iti tabako tapno maaddaanda iti natinggaw a boses inton ipresentarda ti kayatda a floor price kadagiti adda iti pribado a sektor.

“Nagasattayo a tobacco farmers ta adda ti tripartite conference a maang-angay iti tunggal dua a tawen. Daytoy ti proteksiontayo ken gundawaytayo metten a mangipeksa iti kayattayo a presio,” kinuna ni Reyes.

Napagtitinongan dagiti farmer leaders iti nasao a kumperensia ti presio ti tabako nga idatagda iti tripartite conference itoy a bulan kas naibatay iti production cost a nanayonan iti 25% mark-up nga umabot iti P127,236 ti paglakuan iti tunggal ektaria: AA – 92.20;A – 90.20; B – 88.20; C – 86.20; D – 81.20;E-80.20; F1 – 76.20; F2 – 74.20 ken reject – 54.20.

Kinuna ti gobernador a masapul a takuaten dagiti eksperto iti NTA no kasano a mapaadu ken umatitiddog dagiti binulong ti tunggal mula a mangitunda iti dakdakkel a kita dagiti mannalon kasta iti pannakaipababa ti gastos iti produksion kangrunaanna ti mausar a ganagan ken insektisidio ken ti pasnnakapatalinaed ti natibker a presio dagiti partuat a bulong ti tabako.

Mainaig iti tobacco by-products a tobacco dust, tobacco pulp ken bioethanol manipud iti tabako, kinuna ni Savellano a nupay napintas dagitoy kas alternatibo ngem nasaysayaat nga amang no ti kangrunaan nga usar dagiti bulong ti tabako ti tutokan ti ahensia.#