Footer

SALAYSAY: Ambassador Leoncio Cardenas, Jr: baro a Konsul Heneral ti Philippine Consulate ditoy Honolulu, Hawai

NO AR-ARIGEN, saan pay a napudotan ti sapatos Leoncio Cardenas, Jr., ti baro a konsul heneral ti Philippine consulate ditoy Honolulu, Hawaii a bimmaba iti eroplano idi Hulio 28, 2009, malem ti Martes, addaytan dagiti dati ken nasinged a gagayyemna a simmabat kenkuana.

Karaman kadagiti simmabat kenkuana da dati a Rep. Ben Cabreros, UFCH President Eddie Agas, Sr. ken Mrs. Aurea Agas, OFCC president Danny Villaruz, Mary Cordero, Alice Busmente a mangibagi ti Fil-Am Courier, UFCH Board of Governors: Amado Yoro ken Philip Alcain, Sonia Lugmao Aranza ken Danny Aranza, ket naangay ti maysa a get together iti pagtaengan da dati a Rep. Jun Abinsay ken Dra. Elizabeth Abinsay.

Iti baro a tour of duty ni Ambassador Cardenas, agpaay a baro a Konsul Heneral ditoy Honolulu kas kasukat ni Ambassador Ariel Y. Abadilla a naidestino iti Philippine Embassy, Ireland.

Kaudian a nagpaayan ni Cardenas iti foreign post iti Embahada ti Pilipinas iti Dili-Timor-Leste a nagpaayanna a kas Ambassador Extraordinary & Plenipotentiary.

Saan a ganggannaet ni Consul General Cardenas iti Honolulu. Nagpaay a consul ditoy idi 1985.

Nabaknang ti padas ni Cardenas iti tay-ak ti foreign service. Nalawa ti lubongna itoy a diplomatic career. Nagpaay a Third Secretary and Vice Consul iti Philippine Embassy idiay Washington, DC, 1982; Minister and Consul General, Philippine Embassy iti Ottawa, Canada idi 1990; Minister and Consul General, Philippine Embassy, Brasilia, Brazil idi 1994; Deputy Consul General, Philippine Consulate General iti San Francisco, California idi 1999.

Kaudian nga assignmentna iti Home Office kas Assistant Secretary, Office of American Affairs.

Nagpaay pay toy anak ti Badoc, Ilocos Norte kadagiti sumaganad nga opisina ti Department of Foreign Affairs: Office of Personnel and Administrative Services, Office of Economic Affairs, Office of Asian and Pacific Affairs, Office of European Affairs, Office of Fiscal Management and Services, ken Office of American Affairs.

Nalpas ni Cardenas ti Bachelor of Science in Foreign Affairs iti University of the Philippines idi 1965; sa ti Master of Business Administration, sans thesis, iti Letran College, Manila, Philippines.

Adu ti panggepna nga irusat iti kaaddana iti Honolulu. Kitkitaenna ti nasingsinged a kammayyet ti Filipino a komunidad, Ilokano man wenno Tagalog, ken dadduma a sektor ti komunidad, ti pudno nga espiritu ti diplomatiko a lubong, ken ti pannakatagiben ti pudno a kultura ken tradision a Filipino.

“The Consulate is open for everyone. Please feel free to call our office, the lanai and the office as well. As a representative of the Philippine government here in Honolulu, Hawaii, my staff and I are ever ready to provide any assistance to you,” kinuna ni Consul Cardenas.

Umuna nga opisial a panagparang ni Cardenas kas Consul General iti gimong dagiti Filipino idi pasken ti Kalayaan Philippines Hawaii, Huwaran Award night a naangay idi Hulio 31, 2009 iti Pacific Beach Hotel.

Lima ti annakna: da Bryan, Cecile, Karen, Paolo ken Lani.#

Comments are closed.