Footer

SARITA: Panagsareb Iti Sumipnget ( Maikatlo a paset)

Saan a dita ti pagtungedan ti kalbario. Ti buridek a babai nga agis-iskuela iti nursing, naibarkada met kadagiti youth gang. Madanaganak unay iti sasaadenna. Dandani inaldaw ken rinabii ti riribuk a parnuayen dagiti youth gang. Dagiti laeng nagan dagitoy a youth gang ket umanayen a makapasidduker: Pinoy True Crips, Blood Down Posse, North Side Terrorist, Notorious Underground Crips, Sacramento Tag Crips, Rappers Delta Foundation, Real Pinoy Crips, West Side Terrorists, Sudden Death Gangsters, Mafia Crips, God Mob Carnalis, East Side Thugs, Ragstah, Peer Group Trouble, Trece Hudas, Selda Trece, True Brown Style, Souls ken dadduma pay. Panagriknak, kaslaak kopunban a lukotlukoten dagiti kakasla bantay ti kadakkelna a dalluyon. Isuna laeng ta idurog ti mugingko a saan nga agbalin ti pasenti effect iti kastoy a situasion. Wen, pasenti effect. Piningasak pay ketdin dayta a balikas, inikkatko ti balikas a “mental” ta no mabalin, saanko a kayat a baliksen dayta piningasko a balikas ta didakto ket piduten iti ‘uneg’ ti Mandaluyong. Kasayaatan iti amin, iruar ti pungtot!

No dikay’ agiskuela a nasayaat, siak ti agiskuela!” inyagyagko.

iddut kadi ti imbagak? Nalabit, ta nagkakatawada ketdi aminen a kameng ti pamilia. Adda pay tibnokna a kantiaw.

Apay, ania ti nakakatkatawa iti imbagak?”

Awan! Ngem kasano koma nga agiskuelaka ket laklakayanka la ngaruden ken adda payen apokom!” ti kunsintidora nga ina dagiti uppat a bangad nga annak ti simmungbat.

Agsakitkayo kadi, papa?” sinaludsod ti buridek ket inggay-atna pay a dinapadap ti tengngedko.

Maysaka met! Saanka a lumberjack wenno saan a logging consessionaire iti Cordillera ti pamiliatayo tapno ukkonem amin a wasay iti eskuelaanyo!”

Nakarkaron ti kantiaw ken garakgak iti wasay ti gradona iti eskuelaan.

Uray sika met,” tinugkikko ti muging ti inaunaan a babai ken kalkalpasna laeng ti kursona a nursing ken madama nga agreprepaso iti Northcap Review Center, “no dimo maipasa ti board exam iti panangiyaleng-alengmo nga agrepaso, husto daytan! Iti kaanoman, saankanton a tulongan ta dimo met ammo a tulongan dayta bagim!” Napatilmon pay ti nabirngasan iti “alutiit iti Baguio” iti pamiliami ta pangrapisen, ket kunam la no kasla nagwitdro iti ATM machine no dumawat iti kuarta, ken kasla daytay mangan iti restaurant a mangpanaw lattan ti nangananna wenno nagkapeanna iti lamisaan.

Ti napigsa a laaw ti bulong ti ridaw ti nangiserra iti nalapat a pannakisarita. Di met imbagak a konkontrolek ti bagik? Nangato ngamin ti presion ti darak. Diak kayaten a maulit ti napasamak iti naminsan a nabtak ti tallo a branch veins ti kanigid a matak isu a diak a makabasa no diak aramaten ti ayuda. Ken kasayaatan iti amin, tungpalek ti balakad ti doktorko: “No sika ti agpupungtot, iruarmo dayta uttot!” Agpagnapagna iti ruar ti kayatna a sawen, ket sadiay ti pangiruaran ti naullom a sakit ti nakem. Agpalamiis iti ruar.

Natukkol ti tengnged. Narba dagiti abaga. Nakakukot dagiti dakulap iti uneg dagiti bulsa ti agkupkupas a maong kabayatan ti inayad ken managgaysa a pannagna, a kunam la no balud nga agturong iti death chamber tapno awatennan ti maudi nga angesna ditoy lubong. Magmagna nga awan met ti papananna, ken awan ti aniamanna ti kuddot ti nakamulagat nga init, ngem ketdi, parasay maapput ti panulpapen nga agong gapu iti gita ti asuk nga ipugso dagiti naariwawa a luglugan. Nakugtaran ti awan basolna a nalabaga a lata ti 555 ket dandani napuntaan ti walang nga aso a nalabit nga agsapsapul iti sungbat iti boksitna nga agrebrebelde.

Agrebrebelde met ti riknak. Kas daydiay walang nga aso nga awanan iti naituding a papanan, isu a pagna, sige, pagna latta…

Panagriknak iti bagik, kaslaak la natakawan. Sangkakunada man, nasaysayaat kano ti matakawan ngem ti mauraman. Ngem itoy a situasion, kaykayatko pay ti mauraman tapno dumapo aminen ket awanen ti nadagsen a rikriknaek. Mapukpukaw ti bilegko a kas ama. Siguro, agingga iti tungpal biagkon a katay laeng ti tiltilmonek? Mapnek aya ti ama no katayna laeng ti tiltilmonenna? Maagasan aya ti waw ti ama no katayna laeng ti tiltilmonenna? Maminsan laeng nga agarapaap ti ama. Maymaysa laeng ti arapaap ti ama, ti panangtangtangadnanto ti (dagiti) bituen nga annakna inton dumteng ti panawen. Ngem no iti dayta a panawen ket saan a tumangtangad ti ama no di agtiltilmon laeng iti katayna, makarikna iti kinakawaw ti kinaamana, ta napaay ti akemna kadagiti annakna. Napaay iti aramid a dina met ngarud inaramid. Napaay iti basol a dina met basol. Awitennanto dayta nakadagdagsen a pannakapaay agingga iti tanemna, isunto ti aw-awiten ken mangparparigatto kenkuana sadiay eternidad.

(Adda tuloyna)

Comments are closed.