Footer

TUNGTONG ARUBAYAN

Maysa a text message ti nagwaras itay nabiit ditoy probinsia a mangibagbaga nga adda death threat a naawat ni dati a Bokal Efren Rafanan a mapapatay no agkandidato manen iti masungad nga eleksion.

Narigat a patien ti kastoy a text a maawat lattan iti selpon. Mabalin nga aramid laeng ti maysa a sutil tapno “pabaraenna” ti nalamiis a situasion ti politika ditoy Ilocos Sur gapu iti makita nga awan ti tumakder a kasango ni dati a Gov. Luis “Chavit” Singson a nangipakdaar itay nabiit a kumandidato manen a para gobernador kalpasan ti pannakaabakna iti panagtarayna a senador idi 2007.

Idi damo, adda idi naipalapayag a tumaray ni Dip. Eric Singson a gobernador ti Ilocos Sur ta agturpos (manen) ti terminona iti 2010. Ngem iti maysa a pasken iti Candon City, imbatad ti diputado a saan. Ngem saanna nga impalgak no agretiro iti politika a kas ken ni Apo Chavit idi.

Adda met mangibagbaga nga agsubli ni Apo Chavit gapu iti posibilidad nga agtaray a para gobernador ni Dip. Singson agsipud ta no agtuloy daytoy a senario, napuskol a pader a saan a madupir ni Gov. Savellano wenno ni Bokal Jerry a kabsat ni Apo Chavit.

Iti panagsubli ni Apo Chavit, kapilitan nga agpalikud dagiti dua. Agsubli ni Apo DV a bise gobernador ket bokal met ni Apo Jerry.

No saan nga agtaray a gobernador ni Apo Eric, ni ngarud Rafanan ti makita a nabatbati pay a sumango ken ni Apo Chavit. Ngem nagsangoda idin ket inlupek ti political kingpin ni Rafanan. Ngem posible a naturtured itan ni Rafanan agsipud ta saan gayam nga invincible ni Apo Chavit kas naipakita idi nagtaray a para senador a manipud rugi dagiti surbey agingga iti panagbibilang iti butos ket saan a timmal-o iti rangkona manipud iti maika-23 agingga iti maika-25.

Ngem saan a dayta ti pakarukodan no mangrugin nga aglumen ti rimat ni Apo Chavit. Iti dayta nga eleksion, isu pay laeng ti kaaduan iti butos iti Ilocos Sur.

No ni koma Gov. Deogracias Victor Savellano ti kasango ni Rafanan, agbalin a risiris daytoy panagsangoda koma manen. Iti panagsangoda iti kinagobernador idi 2007, awan pay dua a ribu ti baetda iti baet a kameng amin iti administrasion dagiti mayor ditoy probinsia. Iti dayta a baet, iti panunot dagiti dadduma nga umili, awan ti makuna a nalawag a nangabak gapu iti alegasion iti panagsuitik iti sumagmamano nga ili ket tagtagiurayenda la ketdi ti return bout da Savellano ken Rafanan tapno maammuan no sino ti natibtibker kadakuada. Ngem saanton a maammuan pay dayta agsipud iti manamnama a panagsubli manen ti kaanduran a politiko iti Ilocos Sur nga agserbi kadagiti kailianna.

Adu ti agkuna a no saan a minanok ni Apo Chavit ni Apo DV, nailupek daytoy. Kasta met nga adu ti agkuna a no saan koman nga agkandidato ni Apo Chavit, sumublat met dagiti ag-Singson iti Candon City nga agpayakpak dita Kapitolio.

Ngarud, panagkitami, asinoman ti nangipatulod iti text message, kayatna a penken ti maysa a banag: adda pay la ngata simpatia dagiti tattao ken ni Rafanan?#

Comments are closed.