Footer

INDAYON NI LAGIP: Nasasaem ti sakit iti kaunggan (Tuloyna)

Kalpasan ti panagturposko iti kolehio, kinapatangnak ni Angkel Ladio no ania ti panggepko.

“Agsapulak iti trabahok, Uncle. Kayatko nga uray kaskasano, makasubadak iti kinaimbagyo kaniak.”

“Saandaka a pinagadal tapno laeng agsubadka kadakami,” kinuna ni Uncle. “Nasursurodakan nga impateg a kas anak ket pakaragsakanmi no makitadaka iti natalingenngen a kasasaad.”

“Diak ammo ti ania ti nagbambanagak no awankayo ken ni Auntie, Uncle. Palubosandak koma nga agsubad met kadakayo.”

“Saan koma a dakami ti lapped iti planoyo ken ni Lito,” inamad ni Anti.

“Nagpatanganmin dayta a banag, Anti. Agurnongkami pay sakamto agsimpa.”

“Nasayaat dayta a napanunotyo. Magagarannak pay ketdin a makaimatang iti panagkallaysayo,” kinuna ni Angkel Ladio. “Tagtagiuraymi ti pannakapunno toy balay iti sangit dagiti ubbing.”

“Ni met, Angkel. Dagdagennak manen nga agkasar. Isaganami pay ti masakbayan ti agbalinto a pamiliami.”

“Ala, diyo baybayagen ket madlawkon nga agkaratukot ti tumengko. Baka diak makaaw-awiren no kua…” nakuna ni Angkel.

Nakastrekak a kas web designer iti maysa a dakkel a kompania iti siudad ti Vigan. Dakkel metten ti sueldok ket sapsapadon a para kaniak. Dakkel ti sueldo ni Lito kas project engineer iti maysa a dakkel a construction firm. Makatawen kalpasanna, imbaon ti kompaniada iti Saudi Arabia a mangkita kadagiti proyektoda.

Iti damok a sueldo, gimmatangak iti bado ken pantalon ni Angkel ken blusa ken sapatos ni Anti. Iti simmaruno a Domingo, nagkukuyogkami a napan nakimisa ket kalpasanna, napankami nagbuya ken nangaldaw iti maysa a nalatak a panganan iti asideg ti Simbaan ni San Pablo.

“Ne, baka biroken ti boksitko diay pinangaldawtayo,” nakuna ni Angkel. “Ita la a makadap-awak iti nangina a panganan, sika.”

“Sipsiputanka ngarud itay amangan no ingatom ta sakam a mangan,” insutil ni Anti.

“Pagsayaatanna ta saanda nga iparit ti agkammet iti napanantayo.”

“Talaga a kasdiay, Angkel. Kamayan ti nangiserrekak kadakayo tapno naim-imas ti pannangantayo. Diak kayat ti sabali a panganan, lalo dagiti Japanese ken Chinese restaurants, ta chopsticks ti usaren.”

“Dakkel siguro ti nagas-tosmo,” nakuna ni Angkel. “Agasem, ta sir, ma’am ti awagda kaniami. Ken naisem ken nakapimpintas dagiti nangasikaso kadatayo.”

“Bassit dayta a banag no maidilig iti kinaimbagyo kaniak, Angkel, Anti,” nakunak. “Ita ta adda metten mapetpetak a kuarta, kayatko met nga uray sangkabassit laeng, maparagsakkayo.”

“Baka awan ti maurnongmo,” kinuna ni Anti. “Ti metten bukodmo a bagi ti panunotem. Saannakami a pakaringgoran. Nasalun-atkam’ la ketdi, saankami nga agproblema iti pagbiagmi.”

Kalpasan ti makatawen, kinapatangko da Angkel Ladio ken Anti.

“Agawisen ni Lito nga agkasarkami, Angkel. Dawatek ti pammalubos ken pamendisionmo kadakami.”

“Ne, dayta ti nabayagen nga ur-urayek nga ibagam,” nakuna ni Angkel Ladio. “Tiempona metten nga agsimpakayo.”

“Agyamanak, Angkel,” nakunak ket naarakupko ti ulitegko iti nairut. Ngem iti unegko, naan-anay koma ti ragsakko no nagtaud dayta a balikas iti bibig ti pudno nga amak.

(Adda tuloyna)

Comments are closed.