Footer

Iti baet kampania versus kolorum nga armas: estudiante, natiliwan nga agikut 3 paltog

VIGAN CITY- Iti baet ti kampania ti kapolisan a mairehistro dagiti kolorum a paltog, maysa nga estudiante ti natiliwan nga agikut iti kolorum a paltog iti pursuit operation nga insayangkat ti polis iti rabii iti Nobiembre 3 ditoy idinto a nagudas ti maysa a kagawad ti barangay iti nagsina nga insidente a napasamak ditoy siudad ken iti Bantay, Ilocos Sur iti umuna a lawas daytoy a bulan.

Iti pannakaisurat daytoy, nakapupok iti pagbaludan ni Robinson Tabaco, 18, estudiante, ket maisagsagana ti kaso nga illegal a panagikut ti paltog maikontra kenkuana kalpasan a naipiskot dagiti polis iti pursuit operation kanaig iti mapapati a panagpanggep iti biag ti maysa a residente iti Barangay 9 ditoy siudad idi Nobiembre 3.

Naipiskot ni Tabaco a nagtagaimet iti bag a naglaon iti dua a cal. 38 colt a paltik ken maysa a gauge 12 backshot ken balbala babaen dagiti polis nga indauluan ni Deputy Police Chief Insp. Maximo Taclas bayat ti pursuit operation nga insayangkatda.

Sakbayna, nakaawat dagiti polis iti tawag manipud ken ni Linda Aldaca, 48, residente iti Brgy. 9 ditoy siudad, a mapapati a ginandat a patayen da Joseph Tabaco ken Ronnie Boy Asusano ti anak ni Aldaca a ni Agapito ngem dida napuntaan.

Mapapati nga impaiggem da Joseph Tabaco ken Ronnie Boy Asusano dagiti paltog iti estudiante idi naglibasda.

Madama ti pannakabirok dagiti dua a suspetsa.

Mapapati a dati a susik ti motibo ti pannakagandat ti biag ni Aldaca.

Kabayatanna, awan pay ti suspetsa iti pannakapapatay ti maysa a kagawad ti Barangay Cabalanggan ditoy nga ili idi rabii ti Nobiembre 2.

Pinaltogan ti dua a di pay nabigbig a suspetsa a nakalugan iti XRM a motorsiklo ni Antonio De Peralta Sr., 48, barangay kagawad, residente iti Barangay Cabalanggan ditoy, kalpasan ti panangitulodna kada John Feria ken Pablo Feria iti agarup alas siete ti rabii ti Nob. 2 ket addan iti dalanna nga agawid.

Nagsagrap ni de Peralta iti sugat iti ulo ken nadumaduma a paset ti bagina, ket awanen ti biagna a naidanon iti Metro Vigan Coop Hospital.

Nakarekobre dagiti polis iti 13 a kapsula manipud iti cal. 9mm iti nakapasamakan ti krimen.#

Comments are closed.