Footer

Munisipalidad ti Santa, maam-amak a mapunas iti mapa

SANTA, Ilocos Sur – No saan nga agtignay dagiti agtuturay, adda posibilidad a mapukaw iti mapa daytoy a munisipalidad gapu iti pannakakurukor dagiti barangay ditoy nangruna iti tiempo ti panagtutudo ken idadalapus dagiti bagyo.

Kinuna ni Mayor Jayjay Bueno a pagbutbutnganna la unay ti panagpukaw ti ilida gapu iti tallo a puersa a mangliplipit iti Santa kas iti South China sea, ti Abra river ken ti danum nga aggapu iti kabambantayan.

“Dagitoy ti pakaigapgapuan ti agtultuloy a pannakakissay ti land area ti ili,” kinuna ti mayor bayat ti pannakiuman kenkuana ti DZTP itay nabiit.

Kanaig daytoy, pinasiar itay nabiit ni Department of Public Works and Highways Secretary Victor Domingo, kaduana da House Deputy Speaker Eric Singson ken dadduma pay nga opisial ti DPWH Region I, da Bueno ken dagiti kameng ti sangguniang bayan ditoy dagiti kalsada a dinadael ti Bagyo Pepeng ditoy nga ili kasta met ti maar-aramid a rangtay iti Banaoang.

Impatalged ni Domingo ti pannakasimpa ti national highway a sakup ti Magsaysay District iti daytoy nga ili tapno nasaysayud ti panagbiahe nga agturong iti Ilocos Norte.

Adda maar-aramat a detour iti dayaen ti narba a kalsada ngem pribado a daga daytoy.

Segun iti maysa nga opisial ti DPWH, dakkel a pondo ti mabusbos iti pannakatarimaan ti nasao a kalsada agraman ti seawall ket manamnama nga aggapu ti loan iti sabali a pagilian.

Pinasiar ti sekretario ti maar-aramid a rangtay iti Banaoang a manamnama a maluktan iti bulan ti Disiembre.

Kinuna ni Bueno a mapattapatta a makurukor iti tinawen ti manipud iti 10 kadapan agingga iti 20 kadapan iti land area ti Santa ket nalawlawa pay no napipigsa dagiti bagyo a sumangbay.

Dinakamat ti mayor dagiti coastal barangays a pakairamanan ti Basug, Cabangaran ken Manueva a kilometro ti kaadayoda idi iti Karayan Abra ngem iti agtultuloy a pannakakurokorda, adda payen dagiti naiyanud a balbalay ken napukaw a kataltalonan.

“Santa would cease to exist as a municipality… no more source of livelihood for the people of Santa… and no Santa to speak of… mawawala na ang identity ng mga tao dito,” insungbat ni Bueno idi madamag no ania ti maysa kadagiti pagbutbutnganna a mapasamak no saan nga insigida a mataming daytoy a problema.# 

Comments are closed.