Footer

BANNER NEWS: Nangatgato a floor price ti tabako, irupir da DV, mannalon iti tripartite confab

VIGAN CITY- Impatalged ti gobernador ditoy probinsia nga idauluanna ti grupo ti mannalon ditoy Ilocos Sur a mangirupir iti pannakaited ti nangangato a floor price ti produkto a tabako iti masungad a tripartite conference.

“Masapul nga umatendertayo tapno nasaysayaat met laeng ti panangirupirtayo iti nangatngato a floor price ti tabako,” kinuna ni Gov. Deogracias Victor Savellano idinto nga impakaammona a maangay ti tripartite conference iti nagbaetan dagiti agmulmula iti tabako ken dagiti agparpartuat iti sigarilio ken traders iti Manila inton Nobiembre 12.

Iti naisayangkat a tobacco tripartite consultative meeting iti nagbaetan dagiti tobacco farmers ken dagiti manufacturers idi Septiembre 30 iti provincial capitol babaen ti initiatibo ti gobierno probinsial, P2 laeng ti nagpatinggaan dagiti agparpartuat iti sigarilio a maituon iti floor price ti tabako a Birhinia iti masungad a panagtatabako, adayo nga amang a nababbaba ngem iti P19.84 a kiniddaw dagiti agmulmula iti tabako a pakaingatuan ti floor price daytoy a produktoda.

Gapu iti nababa a maituon iti floor price ti tabako, dismayado ni Bernard Vicente, dadaulo dagiti agmulmula ti tabako iti Sinait, Ilocos Sur ken napusgan a mangibagi kadagiti mannalon.

Kinuna ni Vicente a no saan a mapatgan ti naudi a kiddawda, amangan no adu a mannalon ti saanen nga agmula pay itoy kangrunaan a produkto ti probinsia.

Maysa nga aldaw sakbay ti tripartite conference, nagtataripnong dagiti mannalon manipud iti Ilocos Norte, Ilocos Sur, Abra ken La Union ket iti komputasionda, umabot iti P114,040.40 ti gastosda iti tunggal ektaria ket indatagda ti P19.84 a pakaingatuan ti floor price ti tabako manipud iti P61 a napatgan idi 2007.

Ngem kinuna dagiti agparpartuat ti sigarilio a P2 laeng ti maituon iti floor price ti tabako uray imbaba payen dagiti mannalon ti kiddawda iti P10 kada kilo.

Iti interbiona iti media kalpasan ti napaay a tripartite conference, kinuna ni Savellano a ti dakkel a paggiddiatan iti komputasion iti magastos iti panagmula iti tabako kas iti ganagan, pestisidio ken panangdan ti saan a pagsabatan dagiti mannalon ken agparpartuat ti sigarilio.#

Comments are closed.