Footer

SALAYSAY: Ipapan iti Tineg: Tallo nga Aldaw a “Walk with Faith”

Kalpasanna, irugimon ti tallo nga aldaw a “walk with faith” kas panangiladawan ti gayyemko. Nupay kasta, adda met dagiti kabalbalayan a malabsam iti panagdaliasatmo ket mabalinmo ti dumagas a makiinum wenno aginana.

Natural a managpadagus dagiti Tingguian (awag iti tribu ti Itneg kadagiti upland towns ti Abra). No mapanka iti maysa a barangay, arig dika makatig-ab iti bussogmo ta tunggal balay a papanam, adda taraon nga idasarda kenka.

Kinuna ti gayyemko a sukatanda iti sangabukel a sibibiag a native a manok ti sangalata a sardinas. Ibilang kano dagiti agnaed nga espesial a sida ti sardinas.Ta iti kinaadayoda iti kabesera, dandani awan makadanon a komersial a tagilako iti lugarda. No adda man dagiti sumagmamano a makadanon a lako, doble wenno triple ti agbalin a presioda.

Anian a nagrigat ti panagbiagda, nakunak iti nakemko iti daytoy a naammuak. Maysa daytoy a realisasion a kapanglawan ti probinsiami no maikumpara kadagiti kaarrubana a probinsia iti Amianan.

“Sobra a napaidaman iti umno a serbisio ti ilimi. Nagasatak ta naikkannak iti oportunidad nga agnaed ditoy baba,” nakuna ti gayyemmi.

Innayonna nga awan iti kuriente sadiay, awan telebision ken siempre, awan makausar ti cellular phone gapu ta awan ti signal.

Adda kan met a maala a frequency ti sumagmamano nga AM radio station, dagiti adda portable radioda a battery-operated, segun pay iti gayyemmi.

Awan ti ospital. No adda kan masakit, saan la ketdi a grabe, idalan ti albulario iti sapsapo kadagiti herbal nga agas ngem no emerhensia, itaray ti pamiliana nga awiten wenno assiwen tapno maisalogda iti ospital ti Bangued. No awan ti gasatna, maiyaramidan iti simple a lungon ket maitabon nga insigida ta narigat a makadanon a sigida ti serbisio dagiti funeral homes iti Bangued.

Nakuna ti gayyemmi a ti kadakkel ti internal revenue allocation ti ilida, mabalin koma daytoy a mausar a pagpatakder ti uray bassit laeng a hydropower plant a mabalin a paggappuan iti kuriente.

Maysa a maestro iti high school ti ama ti gayyemko. Adda kan met maysa a pagadalan ti high school sadiay ken sumagmamano a pagadalan-elementaria. No adda kan maangay a miting wenno pasalip iti division level, lima nga aldaw sakbayna, rugiandan ti sumalog.

Dakkel a problema dagiti mannalon iti pannakailako ti apitda ta kapilitan nga isalog nga ibiahe iti kabisera. No adda kabalioda, daytoy ti usarenda a transportasion ngem no awan, anusanda a baklayen nga isalog. No mailakoda ti produktoda, gumatangda iti abastoda a pakaanayan ti kuartada ta mabayag manen sada makasalog.

(Maigibusto)