Footer

SALAYSAY: Taldiap ken ni Bagyo Pepeng: Makalawas a kinadamsak (Maikadua a paset)

Naireport a 500 a residente ti Poro, Magsingal ti nagbakuit iti ili ken iti People’s Coliseum iti Sto. Domingo gapu iti panagdinakkel ti danum iti barangayda.

Aganay a 31 a pamilia wenno nasurok a 150 a tattao ti naibakuit manipud iti Sta. Catalina gapu iti layus.

Maysa ti naireport a natay a babai iti Sta. Maria, Ilocos Sur gapu iti pannakatnagna manipud iti motorsiklo a minaneho ti asawana iti kanal.

Nadadael ti linia ti elektrisidad ket nagpukaw ti koriente iti adu a lugar iti probinsia a pakairamanan ti Vigan City ken kaparangetna nga ili.

Idi Oktubre 6, nagtalinaed ni Bagyo Pepeng iti yanna a kasla adda tagtagiurayna.

Segun iti maysa a lokal a forecaster, nagtalinaed ni Bagyo Pepeng iti yanna gapu iti panangguyod ti Bagyo Quedan a simrek iti area of responsibility ti pagilian idi Oktubre 5.

Iti immun-una a pakdaar ti Pag-asa, posible a tumipon ni Bagyo Pepeng ken ni Bagyo Quedan sada agmaymaysa a pumanaw iti pagilian ngem saan a napasamak ti panagtipon dagiti dua a bagyo.

Idi Oktubre 7, nagbaw-ing ni Bagyo Pepeng ket sim-manglad iti daga iti maikadua a gundaway sa nagin-inayad nga agturong iti direksion ti Apayao ken iti Cordillera. Nupay kimmapsut ni Bagyo Pepeng, nagtalinaed ti Signal No. 2 iti Ilocos Sur, Apayao, Abra, Ilocos Norte ken Mountain Province ken nagsagaba dagitoy iti bayakabak ken angin.

Ngem nagbaliw manen ti direksion ti bagyo ket nagsubli iti Cagayan kalpasan nga immagibas iti asideg ti Isabela a nangisangbayanna iti nakaro a layus kadagitoy a probinsia. Rimmuar ti bagyo iti Cagayan, nagtalinaed manen iti puestona iti baybay sa idi Oktubre 8, naginayad a nagpalaud iti direksion ti Laoag City a nagsagrapan latta ti Ilocos Norte ken Ilocos Sur iti bayakabak ken napigsa nga angin.

Iti maikatlo a gundaway, nag-land fall ni Bagyo Pepeng ket limmabas iti Ilocos Sur, sana indaknir ti napigsa a tudo ken angin iti La Union ken Pangasinan ken pakairamanan ti Benguet, Baguio City ken kabangibangna a probinsia ket iti nagmalem, naglak-am dagitoy a lugar iti nakaro a tudo ken angin ken nakaro a layus.

(Adda tuloyna)

Comments are closed.