Footer

TUNGTONG-ARUBAYAN: Nakakaapal a Kinapudno (Tuloyna)

Kas mapaliiwtayo kadagiti linaon dagiti SALN wenno statement of assets, liabilities and network dagiti opisialtayo, kellaat man ti ingangato wenno ilolobo ti kinabaknangda iti baet ti kinababa ti sueldoda ken awan naideklara a sabali pay a pamastrekanda. Saan a nakapappapati dayta a banag. Saan a maikkat ti suspetsa a nabalkot la ketdi iti misterio ti ibabaknang ti maysa nga agtuturay.

“…Due to loopholes in the law and flaws in the way the forms were crafted, the corrupt are able to evade detection,” kinuna ni dati a Civil Service Commission chairperson Karina David.

Kabayatanna, dagiti babassit nga empleado a bassit ti indeklarada a sanikua ken agtungtungpal laeng kadagiti annuroten ti potensial nga agsagrap iti pannusa a panagpalsipika iti dokumento.

Iti ababa a pannao, awan ti matiliw ken maikarsel a dakkel nga ikan. No adda man, once in a blue moon laeng. Ta agbalin a killo ti nalinteg no masipngetan. Adu dagiti di makitkita nga anniniwan iti kasipngetan.

Iti laksid a ti laeng Pilipinas ti makunkuna a nangarakup iti Kristianismo iti Asia, kabaliktad ti turturongenna iti rumbeng koma a pagturonganna. Adayo unay iti panggep ken anag ti kinaasinona. Daydiay nagtaud iti ngiwat ken pinarintumenganna ket maigidiat iti aramidna. Saan a maikanatad dayta a banag.

Kinuna naminsan ni Mahatma Gandhi ti India a saan a Kristiano ngem managbasa iti Bilia. Idi sinaludsod ti maysa a misionero no apay a masansan nga ibasarna dagiti sinaona iti Biblia ngem saan met nga ag-Kristiano, insungbatna: “Oh, I don’t reject Christ. I love Christ. It’s just that so many of you Christians are so unlike Christ.”

Innayon pay ni Gandhi, “If Christians would really live according to the teachings of Christ, as found in the Bible, all of India would be Christian today.” No koma ta agbibiag amin a Kristiano a kas iti pannursuro ni Kristo, adayo koma iti graft and corruption.

Maysa nga eksperto iti graft and corruption manipud iti Hong Kong – ni Tony Kwok – ti nangadal iti taray ken kasasaad ti gobierno idi 2007. Madakamat a ni Kwok ti responsible iti pannakadalus iti korapsion iti burokrasia ti pagilianna.

Ania ti natakuatan ni Kwok iti daytoy a panagadalna iti pannakaipataray ti gobierno? Kinunana: “Weak laws, a slow judicial system, and public cynicism. Those are the reasons corruption thrives in this country…”

(Maigibusto)

Comments are closed.