Footer

2 natay iti nagsina nga aksidente

MAGSINGAL, Ilocos Sur – Awanen ti biag idi maidanonda iti ospital ti dua a biktima ti nagsina a pannungpar a napasamak ditoy nga ili ken iti Cabugao itay lawasna.

Natayen ni Germelino Castillo, 59, residente iti Barangay Reppaac, Cabugao idi maidanon iti Suero Clinic and Hospital idinto a naideklara nga awanen ti biag ni Edgardo Saliput, 53, taga-Salapungan, Gerona, Tarlac idi maidanon iti ospital.

Dinungpar ti Fariñas Bus ni Castillo a nakalugan iti Honda motorcycle iti national highway a sakup ti Barangay Pug-os, Cabugao, Ilocos Sur idi rabii ti Nobiembre 9 idinto a dinungpar ti RCJ Bus ni Salipod bayat ti panagdaliasat ti traysikel a minanehona iti national highway a sakup ti Barangay Bussaoit, ditoy nga ili idi rabii ti Nobiembre 10.

Nabigbig ti drayber ti Fariñas Bus a nakadungpar ken ni Castillo a ni Columbus Queja, 47, residente iti Barangay Aglipay, Batac, Ilocos Norte.

Segun iti report, tinarayan ni Queja ti biktima ket dimsaag iti Batac. Ti kareliebona a drayber ti nangireport iti napasamak iti polis iti Laoag City.

Kabayatanna, mapapati nga iti pigsa ti panangdungpar ti RCJ Bus iti traysikel a minaneho ni Saliput, nagsina ti motor ken ti sidecar.

Simmuko ti drayber ti RCJ Bus a ni Achilles Pasion, 53, residente iti Barangay Bato, Badoc, Ilocos Norte, iti polis ditoy nga ili ket naipilaanen iti kaso.#

Comments are closed.