Footer

2 negosiante, natakawan

CANDON CITY – Dua a babai a negosiante ti biktima iti nagsina a panagtakaw ditoy siudad itay nabiit.

Iti immuna nga insidente, inlibas nga inkarga ti maysa a lalaki ti uppat a sako nga irik a lako ni Valentina Ramilo, 62, residente iti Cabittaogan, Sta. Catalina, Ilocos Sur.

Naduktalan ni Ramilo nga awanen dagiti sinako nga irik idi mapanna koma alaen iti puestona iti tiendaan iti Barangay San Isidro ditoy.

Segun kadagiti nagdamaganna, inkarga ti maysa a lalaki dagiti irik iti traysikel nga addaan body number 1396.

Kabayatanna, natakaw ti kuarta ni Rosalia Rodriguez, 52, residente iti Barangay San Isidro ditoy siudad nga agdagup iti P4,000 ken dadduma pay a papeles a naikabil iti shoulder bagna ket suspetsana a dagiti uppat a babbai a simrek iti puestona ti nagtakaw.

Segun ken ni Rodriguez, napan nagingagatang dagiti babbai iti puestona ket nakipatpatang dagitoy kenkuana.

Nakapanawen dagiti babbai idi maduktalan ti biktima nga awanen ti bagna.

Kabayatanna, dua a babbai ti inaresto dagiti polis ti Sto. Domingo, Ilocos Sur kalpasan a nasukalan a nagisakibot ti maysa iti sangapakete a sigarilio.

Segun iti report, simrek da Connie Agustin, 33, balo, mapapati a residente iti Sevilla Sur, San Fernando City ken Genalyn Mendoza, 23, residente ti Hilltop, Baguio City a nakaaruatda iti maternity dress iti Bigway Supermart ket naginggagatangda iti groseria.

Nagsuspetsa ti maysa a trabahador ti pagtagilakuan idi saan a makatalna ni Agustin ket idi kinapkapanna daytoy, nasukalan nga nangisakibot iti maysa a ream ti sigarilio.

Naipan dagiti dua iti estasion ti polis para iti pannakapalutpotda.#