Footer

EDITORIAL: Ania ti klasem a mangmangged?

Segun iti Department of Foreign Affairs, adda tallo ribu a kakailiantayo nga adda iti ganggannaet a pagilian, nangruna iti Middle East, ti nakabalud wenno sumangsango iti pannakaipupok gapu iti nagduduma a kaso.

No patien ti DFA, agdagup iti 70 porsiento kadagiti nakabalud a Filipino gapu iti panaglabsing iti paglintegan iti imigrasion idinto a dagiti dadduma ket naikursongda iti pagbaludan gapu iti panaglako iti maiparparit a droga, panagtakaw ken dadduma pay nga ordinario a krimen.

Dakkel a pagpanunotan no apay nga iti baet ti pannakaammo dagiti kailiantayo a maikaniwas iti linteg ti aglako iti droga, agpasugal, agtakaw ken dadduma pay, ituloyda latta ti aramidda. Saanda ngata a mapanunot a dakkel a pakairubuanda ti aramidda a pakaisaldaan ken pagpeggadan ti naraniag a masakbayan ti pinanawanda a pamilia iti Filipinas? Agsipud ta awan ti piansia ti matiliwan nga aglako iti droga, mabungsotda la ketdi iti pagbaludan.

Ngem no dadduma, napigsa ti awis ti pirak. Makakullaap ti sulisog ti nadaras a panguartaan. Kastay kunadan, ti nasalukag agbiag. Bay-amon no dakes a kinasalukag.

Ita, sursuroten ti DFA dagiti kaso dagiti kailiantayo kas panangitedna iti tulong kadakuada.

Malaksid nga ammo met dagitoy a kailiantayo a maiparit ti panaglako iti droga, panagpasugal, ken dadduma pay a bisio, agaramidda latta ta posible nga ipagarupda nga awan ti pagdaksanda ta ordinario dagitoy a mapaspasamak iti naggapuanda a pagilian. Ipagarupda siguro a nalaka a mapapetpetan dagiti otoridad no maduktalan ti maikaniwas nga aramidda wenno kas kalukay ti hustisia iti pagilianda ti hustisia iti Saudi Arabia.

No dadduma, mababalawtayo dagitoy a kailiantayo agsipud ta ikuyogda ti nakairuamanda, uray no dakes, iti sangladanda a pagilian. Naladawen no maduktalanda a kasungani iti kinalukay dagiti otoridad ditoy pagiliantayo, estrikto ken awan ti santuen dagiti pannakabagi ti linteg ken dagiti hues kadagiti aglabsing iti paglintegan ti pagilianda, nangruna kadagiti ganggannaet.

Ngem saan met a mailaksid iti pammabalaw ti gobiernotayo gapu iti nakurang a panangipasagepsepna kadagiti mapan mangged iti sabali a pagilian a sabsabali ti kultura ken kaugalianda ket nasken a maikkanda koma iti naan-anay nga orientasion tapno dida makmaklaat no nakasangpetdan iti destinasionda. Kasapulan ti naing-inget a pannakaarisit dagiti kailiantayo a mapan agtrabaho iti ganggannaet tapno dagiti koma mangmangged a makabael, managtungpal iti linteg ken managdayaw kadagiti otoridad ti maibaon kadagiti naruay a kasapulan a pagtrabahuan iti sabali a pagilian. Saan a malibak a dagiti kailiantayo a mangmangged ti rupa ti pagiliantayo iti pagtrabahuanda a pagilian.

Adda pagsasaotayo: ibagam no ania ti klasem a mangmangged ket ibagak no ania a klase ti pagilian a naggapuam.#