Footer

INDAYON NI LAGIP: Nasasaem ti sakit iti kaunggan (Tuloyna)

Imballakad ni Angkel Ladio a mapanmi awisen ni Amang ken dagiti kakabsatko iti umadani a kasarko. Agkitakitak koma ngem rimmimbaw ti riknak a kas anak nga agraem iti nakautangak iti biag uray no saannak nga ibilang nga anak.

Ni Manang ti nangibagaak a mapankami iti dayta a malem ken ni Lito iti balay da Amang. Saan nga ammo da Angkel Ladio ken Anti nga idi addan pagsapulak, tultulongak ni Manang iti bassit a tianggina. Siak ti nangted iti puonanna. Iti tianggi ti kangrunaan a paggapgapuan ti pagbiagda kada Amang. Ngem pinagkarik nga awan ti pangibagbagaan ni Manang, uray pay kada Amang ken Manong.

Ngem anian a pannakapaayko ta ti la kabsatko a babai ti nadatngak iti balay. Awan ni anniniwan ni Amang ken ti inaunaan a kabsatko. Naammuak a nasapa a pimmanaw ni Amang ken ni Manong. Dida kano imbaga ti nagturonganda.

Diak naigawid ti luak idi aggawidkamin ken ni Lito.

“Saanka kadi nga agsangit,” nakuna ni Lito. “Addanto panawen a maawat ni Amangmo nga awan ti basolmo iti pannakatay ni Inangmo.”

Namrayak laengen ti nagsangit iti abaga ni Lito.

Idi nagkasarkami ken ni Lito, saan manen a naan-anay ti ragsakko. Ni laeng Manang ken dagiti kaarrubami ken kakabagianmi ti dimmar-ay iti kasarmi.

“Diak man ammo no napananda,” nakuna ni Manang. “Nagpellesda met a nasapa. Kunak no ditoy ti turongenda.”

Bayat ti nabaknang a pangaldaw a naangay iti maysa a nalatak a panganan, tinagtagiurayko da Amang ken ni Manong. Ngem nakapanawen ti kaudian a sangailimi, diak ida nakita.

Iti dayta nga aldaw, nabukel iti panunotko a talaga a tumukno iti langit ti gura kaniak ti amak. Napukaw naminpinsan ti sangkaballing a panagraemko kenkuana kas nakautangak iti biag.

Kalpasan ti kasar, immulikami iti baro a balay a pinatakder ni Lito. Dua kadsaaran ti kongkreto a balay a naipatakder iti panglawaen a solar.

Inawisko da Angkel Ladio ken ni Anti a makipagnaedda kadakami.

“Sino ngarud ti mangkita daytoy balaymi no umaykami?” nakuna ni Anti.

Gapu ta diak ida mapagtung-ed, kinunak a pasuktak laengen ti balayda iti bungalow tapno nalawlawa met laeng a paggiananmi no sumarungkarkami kadakuada lalo no dumakkel ti pamiliami.

Agkitakit koma ni Angkel Ladio ngem iti dayta a gundaway, siak ti napatungpal.

Kalpasan ti nasurok a makatawen, inyanakko ni Mildred. Kalpasan iti dua a tawen, simmaruno ni Andy.

No kasdiay a mapankami sumarungkar iti balay da Angkel Ladio, mapunno ti salas iti garakgakda gapu iti kinatarabitab dagiti annakmi. Magustuan dagiti annakko ti agdengngeg kadagiti sarsarita idi ugma ni Angkel Ladio.

Magustuan dagiti ubbingmi ti sumurot ken ni Angkel no mapan agpuros iti nateng iti likudan ti balayda. Dagitoy ti lutuen ni Anti a pangaldawmi ket maragragsakanda nga agassawa no makitada ti kinaimas ti pannangan dagiti ubbingmi.

Iti panaglabas dagiti tawen, dandani met la nagluniten ti sugat nga impalay ni amang iti kinataok. Ngem maysa a malem, nadatngak ni Manang iti salasmi nga agsangsangit.

“Apay nga agsangsangitka, Manang?” sinaludsodko.

“Ni Amang ken ni Manong, nadisgrasiada! insaibbekna.

(Maigibusto)

Comments are closed.