Footer

Mannalon, traders di nagkasurotan maituon iti floor price ti tabako

VIGAN CITY – Agsubli dagiti mannalon ken traders ken agparpartuat iti sigarilio para iti round three ti tripartite conference kalpasan ti pannakapaayda a makapagsinnurot iti maituon iti floor price ti tabako.

Kinuna ni Bernard Vicente, para sao dagiti mannalon, nga awan ti naipinal a maituon iti floor price ti tabako iti nasao a tripartite conference a naangay iti opisina ti National Tobacco Administration idi Nobiembre 12.

Nupay inrupir dagiti mannalon ti P10 kada kilo a maituon iti floor price daytoy a produkto, saan a nagkir-in dagiti traders iti pagtaktakderanda a P2 kada kilo laeng ti maituon iti floor price iti tabako nga inanamonganda idi kanikadua a tawen.

Iti immuna a kumperensia a naangay iti provincial capitol idi Oktubre 29, immuna nga indatag dagiti mannalon ti P19 kada kilo a maituon iti floor price ti tabako ngem nagbalin laeng a P2 kada kilo ti indatag dagiti traders ken agparpartuat iti sigarilio.

Imbaba dagiti mannalon iti P10 ti maituon iti floor price ngem kaskasdi a saan a nagbaliw ti pagtaktakderan dagiti traders.

Kanaig daytoy, indagadag ni Gov. Deogracias Victor Savellano kadagiti traders a tulonganda dagiti mannalon agsipud ta kangrunaanda a nadidigra iti panangsanot ni Bagyo Pepeng iti Amianan a Luzon.

Ngem kinuna dagiti agparpartuat a naapektaranda met iti Bagyo Ondoy agsipud iti pannakalayus ti plantada iti Marikina.

Kinuna ni Vicente nga adu a mannalon ti kapilitan a nagbunubon manen gapu iti pannakadadael dagiti bunubonda gapu ken ni Bagyo Pepeng ket nanayonan manen ti nagastosda.

Nupay kasta, kinuna ni Vicente nga imbaga dagiti traders nga adda maituon iti floor price ti tabako iti sumaruno a panagmimitingda.

Saan a nadakamat no mano ti pinal nga ituon dagiti traders iti floor price ti tabako.

Naduktalan ni Savellano idi bimmisita iti China a P200 kada kilo ti presio ti tabako ditoy a pagilian. Kinumpirmaran met ni Dip. Eric Singson a P200 met laeng kada kilo ti presio ti tabako iti Malaysia.

Maibilang a sangkapit-ing laeng ti P10 kada kilo a naituon iti floor price ti tabako idi 2007 ken iti nasurok a P90 kada kilo a pinaggatang dagiti traders iti tabako iti napalabas a tobacco season no maikumpara iti presio ti tabako iti China ken Malaysia.#

Comments are closed.