Footer

Mayor ti Honolulu, binisitana nagrubbuatan dagiti Sakada

CABUGAO, Ilocos Sur – No adda singing governor ditoy probinsia, adda met singing mayor ti Honolulu iti kinatao ni Mayor Mufi Hannemann.

Kalpasan ti panagkanta ni Gov. Deogracias Victor Savellano kas panangpadayawna ken ni Hanneman, impangeg met ti naud-udi ti kantana a Blue Hawaii a sinarabo ti sipsipat manipud iti tallaong.

Bimmisita ditoy idi Nobiembre 9 ti grupo ni Hannemann, a pakairamanan ni Representative Joey Manahan, sumagmamano a kameng ti staffna, ken dagiti patneng nga Ilokano a tubo ti Ilocos Sur ken Ilocos Norte nga agnaeden iti Hawaii.

Indauluan ni Savellano dagiti provincial ken municipal officials a nangpasangbay ken ni Hannemann a pakairamanan da Bokal Robert Tudayan, Mayor ti Cabugao Diocaeser Suero, Mayor Edgar Zaragoza ti Narvacan, Mayor Lorenzo Bragado ti San Emilio, Mayor Jesus Sagay ti Lidlidda, Vice Mayor Virgilio Pasion ti Santiago, ken dadduma pay nga opisial.

Maysa kadagiti binisita ni grupo ni Hannemann ti Salomague Port iti Cabugao, Ilocos Sur sada nagturong iti Cabugao Resort a nakaangayan ti maysa a programa.

Maipalagip a nagrubbuat ti grupo dagiti Ilokano iti Salomague tapno mapanda agtrabaho iti kaunasan iti Hawaii idi 1920s agingga iti 1940s.

Naawagan dagiti nagtrabaho iti kaunasan iti Sakada.

Maysa a monumento ti Sakada ti naipasdek iti Salomague kas panglagip ken pangpadayaw kadakuada.

Daytoy ti maikadua a gundaway nga ibibisita ni Hannemann idinto nga inyunay-unayna nga “adda dagiti banag a makitana iti Pilipinas a mangkulding iti pusona” kas iti pannakakitana kadagiti ubbing a nagtatakder iti igid ti dalan iti sirok ti kapudotan para iti pannakapasangbayda.

“Ditoy laeng Filipinas a makita daytoy, narigat a makita iti Amerika,” nakuna ni Hannemann idinto nga innayonna nga “ipakita daytoy ti panagdayaw… personal nga apros ti kinapakumbaba”.

Dinayaw pay ti mayor ti kinalaing ti choral group ti gobierno probinsial a nanglinglingay kadakuada ken dagiti musikero nga addaan rangkap a nangkampania ken ni Savellano iti panagkantana babaen ti gitara ken piano.

Idi dinamag dagiti kameng ti Media ti maal-alimadmad a panagkandidatona a kas gobernador ti Hawaii, inaklon ni Hannemann nga adda dagiti mangidardarirag kenkuana a tumaray iti nasao a puesto ngem kinunana a ti trabahona iti Honolulu kas mayor ti ipangpangrunana nga asikasuen iti agdama.#