Footer

Panaglukat ti Botika ti Probinsia, dinton problema ti gatangen nga agas: Gov DV

VIGAN CITY – Saanton a problema ti magatang nga agas kadagiti district hospitals ditoy probinsia iti panaglukat ti Botika ti Probinsia, segun ken ni Gov. Deogracias Victor Savellano.

“Umanay ti suplay ti agas iti Botika ti Probinsia,” daytoy ti impatalged ni Savellano bayat ti pannakiuman kenkuana ni Jun Ramos iti programana a Barangay Commando Brigada iti DWRS ditoy siudad itay nabiit.

Pormal a naluktan ken nabendisionan ti botika ken iti panagpinnirma iti katulagan ti gobierno probinsial ken dagiti kompania ti agas iti provincial capitol iti malem ti Nobiembre 9.

“Ilako dagitoy a pharmaceutical companies ti agas iti botika ti probinsia ket daytoy ti mangsuplay iti agas kadagiti parmasia iti nadumaduma a district hospitalstayo,” panangilawlawag ti gobernador kadagiti kameng ti Media kalpasan ti pannakalukat ti nasao a botika.

Kinuna pay ti gobernador nga awanton ti bidding iti agas a gatangen ti gobierno probinsial agsipud ta “adda nagsasaritaanen” ti Department of Health, Provincial Health Office, Accounting Office, Budget, ken General Services Office para iti distribusion dagiti agas iti nababa a presio.

“Diak ammo no addanto pay kompania ti agas a maka-bid iti nalaklaka,” kinuna ni Savellano sana innayon a rumbeng a maragsakan dagiti opisial dagiti district hospitals agsipud ta saandan a problema ti paggatanganda ken pangalaanda iti paggatangda iti agas.

Iti napalabas, kangrunaan a reklamo dagiti pasiente a maiserrek iti district hospitals ditoy probinsia a pakairamanan ti Gabriela Silang General Hospital ti kangina ti agas iti ospital no maikumpara iti presio ti agas iti pribado a parmasiutika ken ti kaawan ti madadaan a magatang nga agas a kasapulanda ket kapilitan nga agbirok ti pamilia ti pasiente iti ruar iti ospital.

Kinuna pay ni Savellano a “babaen ti flow chart ken iti sistema a maipakat kadagiti district hospitals, rumbeng laeng a ti pagsayaatan dagiti pasiente ti kitaentayo ket dapat a mapalag-ananda, saanda a mairurumen.”

Naipasdek ti Botika ti Probinsia kas maysa nga economic enterprise ti gobierno probinsial.#

Comments are closed.